Britain hnehin India an tlang

India mipa hockey team chuan nizan khan Great Britain 3-1 a hnehin Tokyo Olympic quarterfinal an lut. Final lut tur chuan world number 1 Belgium an paltlang leh a ngai dawn a ni.

Dilpreet Singh leh Gurjant Singh te goal khat ve ve hmangin India hian chawlhlawk laiin 2-0 in hma an hruai, quarter thumna zawh hma chiahin Sam Ward-a'n penalty corner chhawr ṭangkaiin si phurh sut ṭhen.

Quarter hnuhnung ber tawp dawnah India captain Manpreet Singh chu yellow card hmuh vangin a chhuah a ngai. Player tam zawk Great Britain lamin na takin an nawr let - mahse, midfielder Hardik Singh-a'n counter attack aṭangin a bei let a, a ball vuak hmasa keeper-in lo dang mah se a per let chu mawi zetin a hlap lut.

Quarterfinal inkhel hmasa zawkah Belgium chuan Spain 3-1 in an lo hneh ve bawk. Spain tan David Alegre-a'n minute 10-na lekah goal hmahruai khung mah se, Belgium lamin Alexander Hendrickx-a goal hnih leh Tom Boon te goal khat hmangin an chhanglet.

Australia leh Germany te pawhin an khingpui ve ve hnehin semifinal an lo in hlangkai tawh bawk a, ram pahnih hi final luh inchuhin an in hmachhawn zui ve leh thung dawn a ni. Semifinal hi August 3, Thawhlehniah khelh a ni ang.