India tana bronze medal latu PV Sindhu

Tokyo Olympic 2020-ah PV Sindhu chuan badminton hmeichhe singles-ah bronze medal a la. Indian hmeichhe infiammi zinga Olympic medal pahnih la thei hmasa ber a ni.

Nimin tlai inkhelh hmuhnawm takah, world number 7 Sindhu hian minute 53 chhung lekin Chinese nula He Bingjiao chu 21-13, 21-15 in a hneh. Final inkhelah China nula Chen Yufei chuan world number 1 Tai Tzu-Ying chu 21-18, 19-21, 21-18 a hnehin gold medal a la thung.

Rio Olympic 2016-ah khan Sindhu hian final lutin Spanish nula Carolina Marin a ngam lo, silver medal erawh a hlawh chhuak. Japan kawpuia bronze medal a lak leh tak avangin Olympic medal pahnih a nei ta chiah.

India mipa zingah erawh Sushil Kumar chuan Beijing 2008 (bronze medal), London 2012 (silver medal) Olympic medal pahnih a lo la tawh. Sindhu leh Sushil te chauh hi India aṭanga medal pahnih la thei an la awm.

Inkhel chu
Pathumna inchuh inkhelah Sindhu-i'n bul a ṭan fuh zawk, game hmasa berah 5-2 in hma an hruai ngal. A khingpui hian rawn hnaih chilh lai deuh nei mah se, point 10 a neih chinah a fal - game point hmasa berah ti fuh lo mah se a vawi hnihnaah a la.

Game 2-naah pawh Sindhu che fuh hmasa lehin 5-2 bawkin a kal fal leh. Kal fal erawh a harsat, point hnih vel zelin a sang hret hret zel thung. Hun pawimawh laiah a zawna point thum hmuin a kal fal hret, a tawp thlengin a hawi kir tawh lo.

China nula laka chak hi Sindhu tan chanchin ṭha a ni, tun hma an intawn tawhnaah He Bingjiao hi 9-6 in a record a ṭha zawk. Olympic hma an intawn hnuhnung paliah India nula hi a chak lo vek, tun ṭumah erawh Sindhu hi kawng engkimah a chungnung.

Lungawi a ngai
Inrinni tlai khan Sindhu hian semifinal a khel, tun hnaia vawi thum a ngam lo zawn Tai Tzu-Ying lakah 21-18, 21-12 in a chak lo. Chinese Taipei laka a chak loh hnuin Indian shuttler hian, "Ka theihna zawng zawng ka hmang, mahse ka vanduai ni a thleng," a ti.

World C'ship 2019-ah Sindhu hi a champion a, a hnu lamah erawh result ṭha a nei hleithei lo. Hripui leng vangin World Championships an la khel leh lo - Sindhu hian world champion ni chungin Olympic a hmachhawn.

A laka India mipuite beisei a san avangin inbuatsaihna pawh a nei ngawrh. Korean coach Park Tae-sang ruaiin hri leng karah training a chawl ngai lo, India ram mai duhtawk loin Britain-ah pawh a training hial, a duhthsam gold medal la chiah lo mah se bronze medal pawh India tan chuan hlu tak a ni.