India nulate'n mellung an phun
Tokyo Olympic 2020 neih laiah India hmeichhe hockey team chuan quarterfinal an lut, infiamna khawmpui liana knock out stage an luh vawi khatna a ni - tukin zing dar 8:30 hian Australia nen an in hmachhawn zui leh nghal ang.
Chak ngei ngei ngaihna inkhelah Lalremsiami Hmar awmna team hian, forward Vandana Katariya-i hattrick hmangin South Africa chu 4-3 in an hneh, inkhel dangah Great Britain chuan Ireland 2-0 in an lo hneh ve bawk. Group A aṭangin India hi palina ni chungin an tlang a ni.
Moscow Olympic 1980 khan a vawi khat nan hmeichhe hockey hi telh a ni, khatih lai chuan league match an khel kual vek - chumi hnuah a sang pathumin medal an dawng. Knock-out stage an siam chinah chuan tun ṭum hi India nula ten group match an paltlang lehna hmasa ber a ni hial.
Vanneihna
India hi an group match hmasa pathumah an chak lo. Mahse, an tiatpui Ireland an hneh avangin beiseina an nei thar. Match hnuhnung ber an khelh hmain Ireland nen point thum ve ve an hmu; tlang thei ve ve dinhmunah a ding.
Group match hnuhnung berah India hian vawi li ngawt hma an hruai hmasa, amaherawhchu an hmahruaina hmasa pathum hi South Africa lamin an sut vek - an goal lina erawh Remsiami leh a ṭhianten an hum thei hram.
Team pahnihte 3-3 a an inhentawk laiin Mizo nula Remsiami'n goal khung theihna remchang a hmu, mawi zetin South Africa keeper a bum hnuah a vaw kang keuh a, goal line aṭangin ball hi an lo vuak chhuahsak hman.
Hmabak Australia
India hi group A-ah palina an nih avangin an hmabak a hautak dawn, quarterfinal-a an khingpui tur Australia hi group B hmahruaitu an ni. World number 4 hian match nga an khelhah hnehna an chang vek - India tan hna a awlsam dawn lo.
South Africa leh Ireland lakah goal an khung thei tih an lantir tawh. India hian semifinal luh an duh a nih chuan an tlarhnung lam an thawm phui a ngai dawn. An khingpui tur Australia hi match nga aṭanga goal 13 khung thei, goal khat chauh chhuah an ni.
India tan group match zawng zawngah Remsiami a inlan vek, quarterfinal-ah pawh a inlan leh ang. Mizo nula hian goal khung theihna remchang hmu zeuh zeuh mah se a la vannei tawk lo, a khelh danah erawh coach Sjoerd Marijne a lungawi tih a hriat.
