India medal beiseina Kamalpreet

Olympic hmeichhe discuss throw-ah India tan medal a beisei theih. Inrinni khan Japan National Stadium-ah discuss throw qualifying round neih a ni a, Punjab nula Kamalpreet Kaur chuan 64m a thui thlawhin pahnihna a ni pha. Hmeichhe discuss throw final hi vawiin tlai dar 4:30-ah neih a ni dawn.

Gold medal la tura rinkai United States athlete Valarie Allman chuan vawi khatnaah 66.42m a thlawh a, a tlin nghal avangin a ti nawn tawh lo. Kum 25 mi Kamalpreet erawh vawi khatnaah 60.29m a thlawh a, vawi hnihnaah 63.97m thlawhin tlin pui tham ni mah se ti nawn lehin vawi thumnaah 64m a thlawh.

Valarie Allman hian a mimal record-a a thlawh ṭhat ber chu 70.15m a ni a, chutihrualin Kamalpreet pawh kumin June thla khan 66.59m a lo thlawh tawh. Punjab nula hi a chesual viau a nih loh chuan bronze medal tal la thei tura beisei a ni.