Medal 7 la thei McKeon

Australian swimmer Emma McKeon chuan Tokyo 2020-ah medal pasarih - gold pali leh bronze pathum a la a, hmeichhe swimmer zinga Olympic vawi khata medal la tam ber a ni.

Kum 27 mi Emma hian gold medal pali - 50m freestyle, 100 m freestyle, 4×100m freestyle leh 4×100m medley-ah te a la. Bronze medal pathum - 100m butterfly, 4×200m freestyle leh 4×100 m mixed medley-ah te a la leh bawk.

Emma hi swimmer ropui Olympic ṭum khata medal pasarih la thei Michael Phelps, Mark Spitz leh Matt Biondi te huangah a tel chiah. Russian gymnast Maria Gorokhovskaya pawhin kum 1952 khan medal pasarih a la a, hmeichhe zinga medal pasarih la leh thei hmasa ber chu swimmer Emma hi a ni.

Swimming-ah Phelps a record khm thei an la awm lo, American swimmer hian Athens 2004 leh Beijing 2008-ah te khan medal pariat ve ve a la. Emma chuan, "Ka hmaa swimmer ropui tak takte hnathawh ka thlir ṭhin a, an hnathawh ropui ka tiin ka entawn ṭhin. Chutihrualin an medal lak zat erawh ka chhiar ngai lo. Tun dinhmun thleng tur hian thawkrim a, hlawhtlinna ropui tak ka chang a ni," tiin a sawi.