Pound makatduai 50 man Ben White

Arsenal chuan England defender Ben White chu Brighton & Hove Albion aṭangin an lalut, a man zat chu pound maktaduai 50 niin North London club-in player an lei tawh zinga manto pathumna dinhmun a luah phak.

Kum 23 mi White hian season nga daih contract a ziak, tuna an inrem dan chuan kum 2026 thleng Gunners tan a khel ang - jersey number 4 a ha dawn a, manager Mikel Arteta kaihhruaina hnuaiah hmun pawimawh chang tura ngaih a ni.

Brighton aṭanga inzir chhuak defender hi tun hmain Newport County, Peterborough United leh Leeds United-ah loan hmangin a khel tawh. Leeds hi Championship-ah hlawhtlinna a chanpui a, chumi hnuah a club pangngai Brighton in an kokir.

Season hmasa kha a hmang ṭha, club lian ṭhenkhatin ngaihven viau mah se Seagulls tan September thla khan contract thar a ziak - tun nipui bazarah Brighton lamin chelh duh viau mah se Arsenal dilna an hnawl phal lo.

Brighton tana a khelh ṭhat avang hian England manager Gareth Southgate pawhin ram tana khel turin a ko hial. Euro 2020-ah khan ram tan a feh chhuak a, chawlh a hman avangin Gunners nena an inremna pawh hi a khawtlai phah hret.

Arsenal manager Mikel Arteta chuan, "Ben hi kan player duh leh lak tum tak a ni, ani kan chang thei hi a lawmawm hle. Player fing tak a ni a, ball a thiam tel bawk - a kum la tam lo mah se a puitling tawh, a khelh dan hi kan team nen a inmil bawk," tiin a sawi.

David Luiz a chhuah avangin Gunners hian tlarhnung laia khel tur an mamawh. Rob Holding, Gabriel leh Rablo Mari te an nei sa, Spanish manager Arteta-a'n tute nge a laiah a inkawp tir ang tih chu kan hre thuai dawn.

Nipui bazar lai a ni a, thil tam tak a la thleng thei. AS Roma nen thui tak an indawr hnuah Granit Xhaka man chungchangah Italian club nen an inrem thei lo a, Swiss midfielder hi chhuak tura ngaih ni tawh mah se Emirates Stadium-ah a la cham thei bawk.

Defender Hector Bellerin pawh Inter Milan nen an indawr mek. Serie A champion hi sumah an talbuai a, khawtlang media ṭhenkhat tarlan dan chuan Gunners hian Bellerin bakah pawisa pek belhin forward Lautaro Martinez lakluh an beisei mek niin an sawi bawk.

Arsenal hian tun bazar chhungin Ben White bakah midfielder Albert Sambi Lokonga leh defender Nuno Tavares te an lo lalut tawh bawk a ni.