Pahnihna aṭangin Vettel an hnawl A vawi khat nan Esteban Ocon a chak
Car chesual, in um hmuhnawm, in lehthalna leh intlan pel ropui tak tak chu Hungarian Grand Prix-ah kan hmu vek. F1 huangah a vawi khat nan Esteban Ocon chuan hnehna a chang, champion lai Lewis Hamilton chu hmahruaitu a ni leh ta bawk.
Pathianni zan intlansiak hmuh-nawm takah Sebastian Vettel chu pahnihnaah a thleng, mahse German driver hian inelna neih zawh hian car-a petrol neih tur zat bituk a neih tlin loh avangin hnawl (disqualified) a ni.
A hmuhnawm ngal
Intlansiak hma darkar khat leh a chanve vel chauh awm tawhah ruah a sur, tlan kawng a huh avangin team zawng zawngin kawng nala hman chi motor ke (tyre) an hmang vek - khaw awm dan thlirin thil mak a ni lo, an tih tur dik tak zawk a ni.
Lap hmasa berah buaina a chhuak nghal, kawng kual laiah car an inhawh chilh hnem lutuk avangin an intai palh a, car pariat ngawt a nghawng - inti palh zingah hian championship hmahruaitu Max Verstappen pawh a tel.
Red Bull driver hi kawng sirah a per chhuak a, intlansiak chhunzawm leh thei mah se atan hnehna chan beiseina a awm tawh lo tluk a ni, a tawpa pakuana dinhmun a luah phak kha atan lawmna tur a ni ang.
Risk huai
Ruah a sur chhunzawm lo a, khua rawn ṭhain tlankawng pawh a ro ṭan. Driver zawng zawngin an motor ke hman an thlak lain Hamilton erawhin a ngai a hmang chhun-zawm - Mercedes driver hian risk a la tak meuh.
Midangin pit stop an hman loh laiin Hamilton hian a hmang thung a, car paruk ngawt an tlan chhunzawm theih tawh loh avangin tlankawnga a rawn luh leh meuh chuan 14-na a ni dawrh, driver tam zawk chuan chak an beisei ngam tawh lo ang.
Lap 70 tlan tur zinga 46 an tlan laiin Hamilton hian a motor ke a thlak nawn, hetih lai hian a hmaah Ocon, Vettel leh Carlos Sainz te chiah an awm - champion lai hian a tisual lo, pakhatna ni phak ta chiah lo mah se a elpui Max chet fuh loh niah a che ṭha zawk dinhmunah a ding thei.
Vettel an hnawl
F1 car tanky-ah hian petrol litre 22 a leng, a khat tlata thun hi thil fuh erawh a ni chiah lo. Intlansiak an nih avangin petrol phurh hnem lutuk chuan a rit thei a, car tlan chak zawng kha a ti muang thei bawk.
Petrol thun tam a fuh loh rual hian neih tlem lutuk erawh phal a ni chuang lo, inelna zawhah hian a tlem berah litre 1 tal an nei tur a ni. Vettel khan liter 0.3 chauh a nei, midang aiin a petrol phurh kha a zang fal tihna a ni.
Motor intlansiakna lama thuneitu sang Federation Internationale de l'Automobile (FIA) chuan, "Intlansiak zawha petrol 1.0 neih tlin loh kha a thiang lo, team tin khan tuialhthei thun belh theihna remchang an nei vek. Vettel khan dan a bawhchhia," an ti.
A la tawp lo
British Grand Prix-ah Max Versta-ppen a vanduai a, beiseina sang tak nen Hungarian GP tlan leh mah se a vanduai nawn. Driver championhsip lama hma a hruaina pawh Hamilton lakah a hloh - a beiseina erawh a la tawp lo.
Dutch tlangval Verstappen chuan, "Vanduaina chu a awm thei, chutih rualin team ṭhenkhat chuan mi tih nat an hreh lo niin a lang," tiin lap khatnaah car intai buai vel chu Mercedes vangah a puh a, a lungawi lo hle.
Car intlansiakna sang ber hi tun season-ah vawi 11 an tlan tawh, champion lai Hamilton hi vawi li chak tawhin Max-a hi ṭum nga a chak thung. August 29, Pathianni zanah Belgian Grand Prix an tlan chhunzawm leh ang.
