Thomas Partey dinhmun a chiang lo

Arsenal midfielder Thomas Partey chu Premier League season thar tir lamah kan hmu thei lo mai thei. Gunners manager Mikel Arteta chuan a player dinhmun hi endik a nih tur thu a sawi a, a chawlh chen tur a la chiang lo.

Pathianni zan khan Arsenal leh Chelsea ten season thar inbuatsaih nan friendly match an khel a, Emirates Stadium-ah Thomas Tuchel-a hote 2-1 in an chak. Blues tana Kai Havertz goal khung chu Granit Xhaka-a'n sut mah se, mikhual team lamin striker Tammy Abraham hmangin chakna goal an khung.

Arsenal tan an Premier League-a an elpui tur laka chak loh hi chanchin lawmawm loh a ni a, chak loh bakah midfielder pawimawh chan tel hi chanchin ṭha lo a ni. Atletico Madrid mifielder hlui hi Blues midfielder Ruben Loftus-Cheek nen ball an inchuhna lama hliam niin, first half-ah lak chhuah a ngai hial.

North London club tan hian tun nipui bazar laia an lei - Ben White, Albert Sambi Lokonga leh Nuno Tavares te chu bench aṭangin an lut vek. August 8, Pathianni zana Tottenham nen friendly an khelh turah pawh an inlan leh a rinawm.

AS Roma pan mai tura ngaih Xhaka chuan Euro C'ship zawhah chawlh hmang zoin training a zawm pangngai tawh a, season tharah pawh Gunners midfield lailum luahtu a ni chhunzawm dawn ta niin a lang.

Arteta chuan, "Granit hi kan hnenah a cham ang, kan player pawimawh a ni. Training nei rei hman lo mah se inkhelh nghal a duh, hei hian club tana a inpekna nasatzia a lantir," tiin a sawi.

Arsenal hian Premier League season thar an match hmasa ber atan August 13 zanlaiah kai thar Brentford an tlawh ang. Chelsea hian August 11 zana UEFA Super Cup an khelh hnuah league match khel turin Crystal Palace an lenchilh zui leh thung ang.