CONCACAF Gold Cup Mexico ngamtu USA an champion
North America, Central America leh Caribbean ramte inelna ngaihhlut hlawh ber CONCACAF Gold Cup-ah champion thar a hriat ta a, USA chuan a vawi sarih nana champion nomawi chawi turin Mexico chu 1-0 in an hneh.
Allegiant Stadium-a inkhelah hian fans 60,000 chuangin a hmunah inkhel an en a, an beisei goal hmu tur erawhin an nghah rei a ngai hle - minute 90 chhungin team pahnihin goal an khung lo ve ve a, extra time khelh a ni.
Penalty hmangin chak zawk zawn mai a ngai dawn angin a lang hman hial a, mahse, minute 117-naah Mexican mipui vel turin Miles Robinson chuan USA tan goal a khung - Mexico tan chhanglet turin hun a awm tawh lo.
USA-in kum 2019 Gold Cup final-a an ngam loh tawh Mexico hnehin phuba an la a, he inelnaa champion ngun ber Mexico (11) nomawi chawi ang zat chawi tur erawh chuan kawng zawh tur an la nei thui hle.
Final kalkawng
USA chuan CONCACAF Gold Cup inelna hi khawpui pakuaah a thleng a, ram 16-in inelna hi an hmachhawn - CONCACAF pawn lam aṭangin Qatar chuan inelna hi sawm bik ram angin an hmachhawn a, semifinal an thleng hial!
Team 16 hi group paliah ṭhen an ni a, group khatah team pali zel an awm a, a sang pahnihin quarterfinal an lut. Group B-ah USA awmin match thum an khelh aṭangin point kua an hmu a, hmahruaitu ni chungin quarterfinal an lut.
US hian quarterfinal-ah team ṭha Jamaica chu 1-0 in an hneh a, semifinal-ah Asian champion Qatar an hmachhawn - sawm bik mikhual lakah pawh USA-in zahngaihna an lantir duh lo a, 1-0 a hnehin final an lut.
Mexico-in group A-ah match thum aṭanga point sarih nei chungin quarterfinal an lut a, Honduras chu 3-0 ngawta an sawp hnuin semifinal-ah 2-1 in Canada an hneh ve bawk.
Final chu
Mexico-in first half-ah inkhel an thunun zawk a, an champion leh mai rinna pawh a lian hman hle - Mexican forward Rogelio Funes Mori chuan goal khungna remchang nei mah se a chhawr thei lo.
US tan DC United winger Paul Arriola chuan goal khungna remchang nei ve mah se a khung thei bik lo a, a tawpah erawh USA an vanneih tak tho avangin Arriola chance hlah erawh sawi zui tur a awm ta lo - US an vannei takzet.
Mexico-in inkhelh chhung zawngin 64% zet ball an chang thei a, vawi 22 shot neiin target-ah vawi nga a kal - US lam hian vawi 14 'chiah' shot an nei thung a, heng zinga panga hi target zawnah a kal thung.
Hun tawp dawna chakna goal khungtu Atlanta United defender Miles Robinson chuan, "Eng thil nge thleng pawh ka hre lo a, a hlimawm takzet," tiin an chak chu a lawm thu a sawi.
Golden Generation?
USA-in kum 2017 hnua a vawi khat nan khawmualpui inelnaah champion nomawi an chawi leh ta a, US squad-in hmabak an nei êng anga sawi fo ṭhin chu a tak ngei a ni tih result hmangin an lantir.
Chutihrual chuan he US team hian inelna hi an ngaihlu tawk lo em ni chu aw tih tur a ni a, coach Gregg Berhalter chuan mak tak maiin Chelsea attacking midfielder Christian Pulisic, Juventus midfielder Weston McKennie leh Borussia Dortmund attacking midfielder Gio Reyna te chu squad-ah a telh lo!
US coach Berhalter chuan World Cup 2022 qualification final round inbuatsaih nan Gold Cup hi a hman thu a sawi a, player ṭha koa a champion-na CONCACAF Nations League ai pawhin a ngaihlu lo zawk niin a lang.
Heng ang player langsar awm lo chunga an champion hian US hmabak a êng tih erawh a pholang - champion squad-ah hian Boavista defender Reggie Cannon, Caen forward Nicholas Gioacchini, Schalke 04 forward Matthew Hoppe leh Tenerife defender Shaq Moore te chu Major League Soccer-a khel lo an ni.
