Ukraine boss Shevchenko a chhuak

Player a nih laia khawvel striker ropui ber pawla mi Andriy Shevchenko chuan Ukraine coach a nihna aṭanga a chawlh thu social media kaltlangin a puang a, kum 44 mi coach chuan, "Ukrainian Football Association nena ka contract chu a tawp ta," tiin a sawi.

Shevchenko hian Euro 2020 khelh zawh takah khan Ukraine chu quarterfinal a hruai thleng a, mahse, England lakah 4-0 a mualphoin an zinkawng a tawp.

AC Milan striker ropui ṭhin chuan, "Inkhel hmuhnawm leh ṭha tak kan khel thei tih kan pholang ho a ni," a ti a, Ukraine FA, a thawhpuite leh player te hnenah lawmthu a sawi bawk.

Kum 44 mi Shevchenko hian kum 2016 khan Ukraine national team-ah assistant coach niin a coaching career a ṭan a, July 2016-ah coach puitling atan lak zui a ni.

Ukraine tan match 111 khela goal 48 khungtu Shevchenko hian an ram club Dynamo Kyiv aṭanga a career ṭanin kum 1999 khan AC Milan a zawm a, Italian club-ah hian a hming a chher hle - season sarih zet a khelh chhungin 296 a inlansak a, goal 173-a khung.

Milan tan hian Serie A, Coppa Italia, Supercoppa Italiana, Champions League leh UEFA Super Cup-ah te vawi khat ṭheuh champion nomawi a chawi a, kum 2004-ah phei chuan Ballon d'Or chawimawina a dawng hial a ni.

Kum 2006 khan Milan chhuahsanin Chelsea a zawm a, Blues-ah erawh season hnih a cham chhungin ngai a awh leh tawh lo - match 77 khelin goal 22 chiah a khung a, hetihlai hian AC Milan-ah loan-a kirtir a ni bawk.

Kum 2009 khan Dynamo-ah a kir leh a, match 83 khela goal 30-a khungsak hnuin kum 2012 khan inkhelh a chawlhsan a ni.