Benzema tan contract thar?

Real Madrid chuan an striker chhuanvawr Karim Benzema chu Santiago Bernabeu-a cham chhunzawm tir zel an tum a, football journalist lar Fabrizio Romano chuan Real hian June 2023 thleng cham turin contract thar hi pek a ni dawn niin a tarlang.

Hetihlai hian Spanish media ṭhenkhat chuan Real hian kum 2024 thleng cham turin an duh a, Benzema hian a hnar niin an sawi - a hnar chhan erawh a kum a tam tawh dawn avangin club tana hnawksak nih a hlau niin an sawi thung!

Spanish media-ten an tarlan dan chuan Benzema hian a contract tharah hian 10% in a hlawh a tihniam dawn a, 2022-23 season-ah 15% in a hniam leh dawn bawk.

Kum 33 mi striker hian Real-ah hian kar khatah £294,000 a hlawh mek nia sawi a ni a, Madrid khaw club-a player hlawh hnem ber pawl a ni mek.

French striker hi a kum tam tawh mah se khelmualah erawh a ṭhat ngaiin a la ṭha reng a, season hman zawh takah khan Real tan inelna hrang hrangah match 46 khelin goal 30-a khung a, assist vawi kua a nei bawk.

Kum 2009 khan amah siam liantu Lyon aṭangin Real hi a zawm a, Spanish club tan inelna hrang hrangah match 559 khelin goal 279 a khungsak a, assist vawi 144 a nei thei - Champions League-ah vawi li champion puiin La Liga-ah nomawi pathum a chawi bawk a, Real tan chuan legend a ni.