Lille-in PSG an hneh

French Super Cup-ah Ligue 1 champion Lille leh Coupe de France champion Paris St-Germain te an inhma-chhawn a, minute 45-naa Xeka goal hmangin Lille an chak.

French Super Cup hi Trophee des Champions tihin an sawi bawk a, season ṭan hmaa khelh khelh ṭhin niin England-a a tlukpui chu Community Shield a ni.

Pathianni zan inkhelah PSG-in inkhel an thunun a, Bloomfield Stadium-ah entu 29,000 an pungkhawm. Mauricio Pochettino hote tan hian Abdou Diallo-a'n chance ṭha a hlah a, Mauro Icardi goal khung pawm a ni lo bawk.

Chutihrualin PSG hian an player pawimawh Kylian Mbappe, Neymar leh player thar Sergio Ramos te an la chhawr lo a, heng bakah hian Gianluigi Donnarumma, Marco Verratti, Angel Di Maria, Leandro Paredes, Pablo Sarabia leh Marquinhos te pawhin chawlh an la hmang mek.

Ligue 1 hi August 6, Zirtawpni zan aṭangin khelh ṭan a ni dawn a, match hmasa berah Monaco leh Nantes te an inhmachhawn ang. PSG hian August 7, Inrinni zan dar 12:30-ah Troyes an hmachhawn dawn a, champion lai Lille-in August 8, Pathianni zanah Metz nen an inkhel dawn.