Olympic champion Viktor Axelsen

Viktor Axelsen chuan champion lai Chen Long hnehin Tokyo Olympic mipa badminton singles champion a ni. Denmark tlangval hian gold medal hlawh chhuak tur hian 21-15, 21-12 in hnehna a chang.

Nimin tlai final inkhelah Axelsen hian China tlangval lakah a tir aṭangin inkhel a thunun a, game khatna leh a hnuhnung zawkah dinhmun hlauhthawnawma din lai a nei lo - game hnuhnung zawkah phei chuan point kua zetin a sang fal.

Kum 27 mi Axelsen hian hlawhtlinna hrang hrang a lo chang tawh ṭhin, world champion hial pawh a ni tawh. Mahse, Olympic gold medal erawh a vawi khat lakna a ni a, point hnuhnung ber a hmuh hnuah lawm avangin a biangah mittui a luang.

Rio Olympic champion Chen Long erawh tun hnaia a inkhelh tam lohna a lang. World number 6 hian 2020 khan tournament pahnih a khel a, kuminah erawh tournament khel loin Olympic a hmachhawn.

Lin Dan hnung zuiin Olympic mipa singles vawi hnih champion thei nih a beisei a, final hial thleng mah se ngam loh a tawng - kum 32 mi a nih tawh avangin Olympic lehpekah chuan a vanglai a pel tawh ang.

Badminton Champion-te
Men's singles Viktor Axelsen (DEN)
Men's doubles Lee Yang (TPE), Wang Chi-lin
Women's singles Chen Yufei (CHI)
Women's doubles Greysia Polii (INA), Apriyani Rahayu
Mixed doubles Wang Yilyu (CHI), Huang Dongping