Olympic Hockey Semifinal: Mumang rama cheng Remsiami
Lalremsiami Hmar chuan, "Olympic khelh hi ka duhthusam a ni a, naupan lai aṭanga ka suangtuah ṭhin chu a ni. India chuan semifinal hial kan thleng, mumang rama cheng ang mai kan ni," tiin Vanglaini a hrilh.
Mizo nula Remsiami telna India hmeichhe hockey team hian vawiin tlai dar 3:30 hian, world number 2 Argentina chu Tokyo Olympic semifinal-ah an hmachhawn dawn. Tukin zing dar 7:00-ah Netherlands leh Great Britain te an inkhel ve thung ang.
India captain Rani Rampal chuan, "Olympic medal la turin match hnih chak chauh a ngai tawh, tuna tawp mai hi kan duh lo. Hma lam kan thlir tur a ni," tiin a chhe berah pawh eng medal emaw ber tal hlawh chhuah an duh thu a sawi.
Mumang ram
India hmeichhe team tan an thlen chin hi mumang ram ang mai a ni tawh a, an mumang aṭanga harh chhuah erawh an duh lo ang. Tokyo Olympic neih laia an thlen chin apiang hi mellung thar a ni zel.
Moscow Games 1980-ah khan India hi inlanin palina an ni a, team paruk chauh an inlan. A hnuah Olympic vawi khat khel leh mah se tun ṭum hi group stage an paltang vawi khatna a ni a, quarterfinal-a Australia an hneh pawhin sawi a hlawh tawh.
Coach Sjoerd Marijne-a'n knock out stage chinah a naute a khelhtir dan a thlak danglam, tlarhnung a remphui bakah goal nawr lamah nasa takin hma an sawn - rinkai zawk Argentina lakah pawh chak tumin game plan an siam ang.
A harsa dawn
India hi Olympic inbuatsaih nan khan Argentina-ah hian an zin, match sarih an khelhah India hian chak ni hmel an hmu ve miah lo. Argentine senior team an ngam loh bakah B team leh Youth team nen pawh an inkhel tawk hle.
Kumin tir lama team pahnih inkhelh tawhna thlir chuan Sydney 2000 leh London 2012 silver medalist hi rinkai an ni chiang. Mahse, India nulate hian tun hma lama an la tih theih ngai loh kha an ti miau a, huaisen taka an khel a nih chuan chak thei an ni.
Thenzawl Hockey Training Center lama Remsiami zirtir ṭhintu B. Lalroṭhuami chuan, "Australia an hmachhawn ṭuma an khelh ang khan an khel thei a nih chuan eng team pawh an hneh thei ang, defence a ṭhat bakah attacking pawh a na," tiin Vanglaini a hrilh.
India innghahna
Captain Rani leh Remsiami te hi tlarhma lama India innghahna an ni leh dawn, South Africa laka hattrick siamtu forward Vandana Katariya chungah mawhphawrhna a sang dawn bawk - mamawh tawk goal chu khung thei tura ngaih an ni.
Chak tur erawh chuan goal khung ringawt a tawk lo, mahni goal venhim a ngai dawn. Australia lakah India chhanhimtu keeper Savita Punia lakah mawhphurhna a sang leh dawn, defender Gurjit Kaur leh a hma a ding midfielder Monika Malik ten mawhphurhna an lak leh a ngai ang.
India tan Argentina hi hneh theih loh tur chu an ni bik lo, group match vawi nga an khelh aṭanga ṭum hnih tlawm an nih avangin world number 9 India hi an zuam ngawt bik lo ang. Coach Marijne chuan, "Min thlawpna vangin ka lawm, kan theihna zawng zawng kan hlan leh ang," a ti.
