India tana medal la tur Lovlina

Indian boxer Lovlina Borgo-hain chuan vawiin chawhma dar 11:00 hian Olympic hmeichhe welterweight semifinal-ah Busenaz Surmeneli a hmachhawn dawn a, hnehna a chang a nih chuan gold emaw silver emaw a beisei thei dawn. Assamese boxer hi a chak ta lo a nih chuan bronze medal a dawng ang.

Kum 23 mi Lovlina Borgohain hi last 16 aṭangin a inlan ṭan a, Germany boxer Nadine Apetz chu 3-2 in a hneh. Quarterfinal-ah Lovlina hian Chinese Taipei boxer Chen Nien-chin chu 4-1 in a hneh leh a, medal la pha zingah a inhlangkai.

Lovlina hi October 2, 1997 khan Golaghat, Assam-ah a piang a, boxing-a a sulhnu ṭhat vangin kum 2020 khan Arjuna Award a lo dawng tawh. Assamese boxer hian World Championships leh Asian Championships-ah bronze medal pahnih ve ve a la tawh a, Tokyo 2020-ah record ṭha zawkin a hmuak mek.

Chutihrualin Lovlina khing-pui tur Busenaz Surmeneli hian sulhnu a nei ṭha zawk a, Turkish boxer hian World Championships-ah gold medal a la tawh a, tun ṭumah pawh hian chak tura rinkai zawk an ni ang.

India-in Tokyo 2020-ah hian boxer pakua a tir a, mipa boxer panga zingah medal la pha an awm lo a, hmeichhe boxer pali zingah Lovlina chiah hi semifinal thleng thei a ni.