Semifinal-ah India mipa team an tla Bronze medal match an la khel dawn
Tokyo Olympic 2020-ah India mipa hockey team chu semifinal-ah world champion Belgium 5-2 a hneh loin an tla a, kum 41 chhung an nghah tawh Olympic gold medal chu an la thei dawn rih lo.
India hian semifinal lehlama chak lo Germany nen August 5, Ningani zing dar 7:00-ah bronze medal an inchuh ang. Germany 3-1a hnehtu Australia leh Belgium ten tlai lamah gold medal an inchuh thung ang.
India vanduai
Nimin zing semifinal inkhel hmuhnawm takah India hian bul an ṭan ṭha. Belgium tan Loick Luypaert-a'n hmahruaina goal khung mah se Harmanpreet Singh leh Mandeep Singh te goal hmangin a chhang let a, 2-1 in hma an hruai let daih.
Chawlhlawk hmain Belgium lamin Alexander Hendrickx-a hmangin si phurh an sut ṭhen, 2-2 ni chungin chawlhlawk an hmang a, team pahnih khelh dan thlirin chak zawk tur hriatthiam a harsa hle.
Mahse, an in nawr tawn zak zak laiin India captain Manpreet Singh chu green card hmuh vangin minute hnih a chawlh lailawk a ngai, player tlem zawk India tan inven a harsa - a zawnin peanlty corner vawi thum thum zet an hmu.
Penalty corner pahnih hi chu an inveng thei, a vawi thumnaah erawh Hendrickx-a'n goal kilah tak a thai lut, penalty an hmuh chu khung zui lehin dinhmun ṭha takah an ding, hma an hruaina goal bakah hattrick tlinna goal a nei leh, hun tawp dawnah John-John Dohmen-a'n a khung bawk.
A la tawp lo
Kum 1964 hnua a vawi khat nan India mipa ten Olympic an khel a, world number 4 an nih avangin beisei pawh an nei sang. Mahse, team ṭha leh world champion ni bawk Belgium laka an hmahruaina an hum thei lo a, tunah chuan bronze medal tal an hlawhchhuah a ngai ta.
India tana match 216 khel tawh, defender Rupinder Pal Singh chuan, "Gold medal lak ngei tumin kan bei a, mahse kan vanduai ta si. Chak loh laia lawm chu thil harsa tak a ni, amaherawhchu India tan bronze medal dawn theihna remchang kan la neih hi kan chhawr ṭangkai tur a ni ang," a ti.
Coach Graham Reid chuan, "Hockey chu hriatthiam a harsat chang a awm, a chang chuan inkhel endiktu thutluka siam fuh loh kan tawrh chang a awm ṭhin. Player tawnhriat nei ṭhain inkhel pawimawhah vanduai thlak taka card a hmuh chuan thil a harsa tawh ṭhin.
"Belgium laka chak loh hi a na kan ti, chutih rualin kan beiseina zawng zawng erawh a la tawp lo. Tunah chuan kan rilru zawng zawngin bronze medal match kan ngaihtuah a ngai tawh zawk," tiin a sawi.