Kane a la training lo

England captain Harry Kane chuan nimin lamah pawh Tottenham Hotspur training a la zawm lo a, ni hnih chhung a training loh avangin club-in pawisa a chawitir ang.

Kum 28 mi Kane a training duh loh chhan hi Spurs chuahsan a duh vang a ni a, English striker hian nomawi chawi a duh avangin club lian zawk pan a duh. Premier League top scorer Kane nena an sawizawm chu Manchester City a ni.

Thawhṭanni khan Kane hi Covid-19 test nei tur a ni a, coronavirus test-a a negative phawt loh chuan team zingah a training theih loh. Spurs training-naah nimin thlengin Kane-a hmel hmuh tur awm lo mah se tunkar tawp lamah erawh training hi nei turah an ngai.

Man City hian Kane hi an duh nachungin Spurs phalna zat pound maktaduai 160 chuan lak an tum lo. Premier League champion hian Jack Grealish lak tumin pound maktaduai 100-in Aston Villa an dawr tawh thung.

Kane hian kum 2018 khan a contract pawt seiin kum 2024 thleng Totenham-ah hian contract a nei. Hemi a nih avang hian club chairman Daniel Levy leh a hoten Kane hi an chhuahtir dawn a nih chuan man man taka chhuahtir an tum niin a lang.

Nuno Espirito Santo chuan thla hluia Tottenham manager atana an lakluh ṭuma Kane chungchang a sawi bak English striker chungchang hi la a sawi nawn lo. Spurs hian zanin dar 12:15 hian Chelsea nen friendly match an khel dawn a, August 8, Pathianni zan dar 6:30-ah Arsenal nen an inkhel dawn.

Tottenham hian tun season Premier League-a an match hmasa berah Manchester City an hmachhawn dawn a, hei hi ngaihven hlawh lai chu a ni. Kane hian Man City hi zawm hman ta lo pawh ni se tuna a lan danah chuan Pep Guardiola hote hmachhawn turin a inpeih lo ang.