Chiellini-a'n contract thar a ziak

Juventus defender Giorgio Chiellini chuan season hnih daih contract thar a ziak, an inremna hi a hmang zo a nih chuan Turin club lian tan hian kum 18 chhung hun a hmang dawn tihna a ni.

Italy international Chiellini hian Juve tan kum 2023 thleng a khel dawn tihna a ni a, a contract hun a zawh meuh chuan kum 38 mi a ni tawh ang - club football lama a la rintlak avangin Italy tan Qatar World Cup pawh a la khelin a rinawm.

Serie A club Juventus chuan thuchhuah siamin, "Giorgio Chiellini hian club tan tha a thawh hlawk, tunah leh nakin zelah pawh a ṭangkai chhunzawm ang," tiin an captain lakah rinna an la nghat sang hle.

Bianconeri chuan sawi zawmin, "A thisen leh Juve hi a inzawm tlat a, kum 16 chhung rinawm taka a lo khelh tawhna pawh hian contract thar pek hi a phu a ni," an ti. Fiorentina aṭanga Juve a zawm hnuah hian inelna hrang hrangah match 535 a khelhsak tawh.

Kum 36 mi Chiellini hian Juve tan major title 14 zet a chawi tawh - a nomawi chawi zingah hian a zawna season kua zet Serie A title an lak pawh a tel. Season tharah Inter Milan lak aṭangin league nomawi lak let an tum ang.

A kum tam deuh tawh mah se Chiellini hi a la rintlak. Euro 2020 khelh zawh takah khan Leonardo Bonucci nen inkawpin tlarhnungah an ding nghet hle a, an ramin Euro nomawi an chawi theihna chhan langsar tak pawh an ni.

Juve hian season thar inbuatsaih nan August 8 zanah Barcelona an tlawh dawn. August 22, Pathianni zanah Udinese nen league match hmasa ber an khel ang.