Canadian Open lamah Medvedev leh Osaka

US Open inbuatsaihna zinga mi Canadian Open chu kar leh hian khelh a ni dawn. Inelna buatsaihtu lam chuan player ṭha Daniil Medvedev leh Naomi Osaka te an inlan theih tur thu an sawi chiang.

Canadian Open hi mipa leh hmeichhe lam hi an khelhna a hrang ṭhin. Montreal lamah hmeichhia an inlan dawn a, Grand Slam vawi li champion tawh Osaka hi seeded pakhatna a ni ang - Japanese star tan Tokyo Olympic mangchhia siamṭhat theihna remchang a ni dawn.

Mipa inelna chu Toronto lamah neih a ni leh ang a, season hmasa khan Russian tlangval hian final lut mah se a chak lo. Hard court hi a inkhelh thiamna hmun a nih avangin kuminah champion tum chungin a inlan ang.

Toronto tournament director Karl Hale chuan, "Hri leng vanga buaina a la reh lo, chutih karah inelna lian Tokyo Olympic a awm bawk. Hun chep tak kara inelna rawn hmachhawn tur player zawng zawng chungah lawmthu kan sawi takzet.

"Player tam takin zin vei vah an harsat, a bik takin US lama rawn kal chu a awlsam lo. Inkhel tura rawn zinte erawh him taka an awm theih nan theihtawp kan chhuah dawn a, an him ngei pawh kan duhsak bawk," tiin a sawi.

Montreal lamah hian Belarus nula Aryna Sabalenka chu seeded pahnihna a ni ang. Bianca Andreescu, Simona Halep leh Olympic champion Belinda Bencic te pawh an inlan dawn a, inkhel hi a hmunah entu an awm thei dawn a ni.