400m hurdles record thar siamtu Warholm

Norway tlangval Karsten Warholm chu Tokyo 2020 400m hurdles-ah pakhatna a ni a, gold medal la tur hian 45.94 seconds hmangin world record ama lo siam tawh sa chu a khum leh a ni.

Tun hmain 46.70sec chhungin a lo thleng tawh a, a sulhnu ropui a khum leh avangin midang tan tluk rual loh a ni. American tlangval Rai Benjamin (46.17sec) chu pahnihna niin, 46.72sec chhunga thleng Alison Dos Santos (Brazil) chuan silver medal a dawng ve bawk.

Kum 25 mi Warholm chuan, "Inelna kan neih lai khan keimah leh keimah ka infuih mawlh mawlh, tun hma lam rim taka i thawh tawhna kha tun hun a tan hian a ni, tiin ka infuih nasa hle.

"Intlansiak a zo a, ka hun hman zat ka en chu ka awih lo hial. Ka tan chuan Olympic gold medal hi a hlu takzet, ram tana tha thawh theitu nih hi a nawmna belhchhahtu a ni," tiin a sawi.

400m hurdles-ah hian meter 400 an tlan a ni satliah lo, tlan laklawh laiin tlan kawngah zuan kahlen tur a awm ṭhin, tlan chak bakah zuan thiam a ngai, inelna hautak leh hahthlak zinga mi a ni hial.