East Bengal-in ISL an khel ang - Mamata

West Bengal chief minister Mamata Banerjee chu East Bengal buainaah a inrawlh leh ta a, Kolkata club ṭantute chu lungngai lo tura chahin, "East Bengal-in ISL an khel ang," tiin a tiam.

Tun hnaiah East Bengal thuneitute leh club-a sum thawhtu Shree Cement te an inrem thei lo a, July thla tawp lamah phei chuan East Bengal fan-ten lungawi lohna lantirin buaina a chhuak hial.

Mahse, a hunah tak 'Didi' a lo lang leh ta a, season hmasaa East Bengal-in ISL an khelh theih nana hmalatu hian Red and Gold fan-te chu hlim taka an nuih leh thuai tur thu a sawi.

Mamata chuan, "East Bengal-in ISL an khelh leh ngei ka duh a, inremna a awm theih nan inbiakna kalpui mek a ni. Hrilh ka nih danin East Bengal hian ISL an khel ngei dawn. Nikumah pawh khan Mohun Bagan-in ISL an khelh dawn avangin duhthlan tur dang ka nei lo a, ka lo inrawlh tawh bawk.

"Bagan an awm chuan West Bengal aṭanga ISL club dang an awm belh kha ka duh a ni. Tunah pawh inbe rem turte chu inbe rem mai turin ka hrilh ang a, a fel vek mai ang," a ti!

Mamata chuan East Bengal thuneitute pawh Shree Cement inpekna hrethiam tura chahin, "Kum nga chhunga mawhphurhna lak hi thil namai a ni lo a, sum thawhtute hian vaibelchhe 50 vel an sen a ngai.

"Nikumah khan East Bengal tana sum thawh turin kan hmin tawh a, tunah pawh inhriatthiam lohna awm ho tak chu chinfel a ni ang. East Bengal fan-te an nui leh thuai ang a, club pawhin ISL a khel ang," a ti.

June 2020-a Quess Corp nen an thawhhona an tihtawp hnuin East Bengal hian Shree Cement nen inremna an nei a, Indian Super League an khel zui. Mamata chu inremna awm theih nana thawhhlawk a ni a, an inremna ang hian Shree Cement East Bengal Foundation tih chu din a ni a, cement hmanga sumdawng lian Shree lam hian 76% share neiin East Bengal-in 24% share an nei thung.

Pawl pahnih inremna hi inremna lailawk anga kalpui a ni a, club sporting rights te, a bungrua leh thil dang zawng zawng chu Shree Cement East Bengal Foundation thuneihna hnuaiah dah nghal vek a ni. Mahse, he inremna hi inremna tak tak a nih loh avangin pawl pahnih hian contract thar ziak turin tun hnaiah hma an la a, an buai zui a ni.