Chelsea: Engtia inthuam ṭhat nge an tum?

Frank Lampard enkawlna hnuaia an hui pap pap hnuin Thomas Tuchel-a enkawlna hnuaiah Chelsea an pawr thar a, European champion hian transfer bazar-ah an duh zawng player lakluh tumin an mit an len reng.

Transfer bazar-a thawm nei na pawl ni ziah Chelsea hian tun season-ah player langsar lakluh sawi tur an la nei lo a, free transfer-a forward Jayden Wareham leh goalkeeper Marcus Bettinelli an lakluhte chu reserve lama hun hmang tam zawk tur an ni tih a lang.

Hetiang boruak karah hian Chelsea fan-ten thawm nei na satliah ni loa a tak ram tem an duh a, "Khawiah nge player thar tur chu?" tiin zawhna an zawt ṭan mek.

Blues-in nipui transfer-a player lakluh an tum langsar chu 'striker' a ni a, European football-a striker langsar chin chu an rim deuh vek - sum an ngah a, an duh hlah an tum lo.

Lukaku bawk chu
Blues-in Borussia Dortmund striker Erling Haaland lakluh theih an inbeisei laiin German club-in Norwegian striker hralh tumna an nei lo a, Robert Lewandowski lah Bayern Munich-ah a hlim em em bawk.

London club hian an striker hlui Romelu Lukaku pawh an duh zingah a tel a, khawthlang media-ten an tarlan dan phei chuan Chelsea chuan Belgian striker hi lakluh tumin an dawr der tawh.

Chelsea hian Belgian striker manah hian pound maktaduai 85 bakah Marcos Alonso pek tel an huam a, mahse, Inter-in an striker chhuanvawr hi hralh tumna an nei lo.

Kum 28 mi Lukaku hian 2011 khan Belgium club Anderlecht aṭangin Chelsea hi a lo zawm tawh a, mahse, London club tan hian match 15-ah goal khung a nei lo a, West Brom leh Everton-ah loan-a kaltir a ni.

A hlim
Sky Sports journalist lar Kaveh Solhekol chuan, "Lukaku hian 100% in Inter-ah a rilru a pe a, chhuah tumna a nei lo. Inter tana khelh hi nuam a ti a, club-a buaina siam pawh a tum lo. Antonio Conte-a chhuah vangin a buai lo a, Inter-ah hun duhawm tak a hman avangin a hlim a ni," a ti.

Lukaku hian Inter tan season hnih a khelh tawhah match 95 khelin goal 64 a khung a, season hmasa Serie A nomawi an chawi theih nan player thawhhlawk a ni a, Inter chhuahsan tumna nei lo anga sawi a ni hi a awm lo hran lo.

Mahse, Inter hi sum lamah an talbuai a, Serie A nomawi chawipuitu Conte chhuah chhan pawh sum hman tur chungchanga inremna an neih theih loh vang a ni - nomawi chawi nana player pawimawh Achraf Hakimi meuh pawh Paris Saint-Germain lamah euro maktaduai 60-in an kaltir.

Chelsea lamin hei hi an hre ran a, sum tam zawk nena an dawr chuan Inter hi an hmin theih mai an ring. Blues hi an la ngawi mai dawn lo niin a lang a, chutihruala pawimawh ber erawh Lukaku-a'n London club a zawm hreh loh a ni ang.

Kounde hi?
Chelsea-in tlarhma lamah player an zawn rualin tlarhnung lamah pawh mit an len reng a, rei tak sawi zawm an ni tawh chungin Sevilla centre back Jules Kounde chu inremna an la neihpui thei lo thung.

Kum 22 mi defender manah hian Sevilla hian euro maktaduai 80 an chhiar a, mahse, Chelsea hian French defender ṭhangduang man zatah heti zat thehchhuah hi an zuam lo.

Blues hian a tirah Emerson Palmieri pek tel inhuam chungin Sevilla hi an dawr a, an dawrna hi hnar a ni - hemi hnuah hian euro maktaduai 35 bakah Zouma pe tel turin an dawr leh a, hei pawh hnawl a ni.

Thuthar berah chuan Kounde hian Chelsea pan a duh avangin club pahnih inbe fel thei lo chu hrehawm a ti hle nia sawi a ni a, Euro 2020-a France squad-a tel defender berin chhuah a duh avangin a man zat hi chu la tlahniam leh thei tura ngaih a ni.

A buai kual
Kounde berin Chelsea zawm a hreh lo a, mahse, Blues hian Zouma pek tel an tumna pawm a nih tak lohah chuan dawr chhunzawm leh aiin inhralh ṭhen phawt an duh!

Blues hian Zouma chhuahna tur an ngaihven nia sawi a ni a, Thomas Tuchel-a hnuaia tla tlum lo defender hi West Ham lamin uluk takin an veh mek - Hammers hian an lalut thei a nih chuan Blues hian Kounde lam hi an bawhzui lehnghal thei ang.

Spanish media ṭhenkhat chuan Sevilla hian Kounde hmun ruak luah tur an zawng ṭan der niin an sawi a, Tottenham Hotspur defender Davinson Sanchez lakluh an tum niin an tarlang.

Mahse, Sanchez-a agent Nestor Villarreal chuan, "Hei chu thuthang leng vel mai mai a ni. Sevilla hotute nen pawh kan inbia a, tun dinhmunah chuan an squad a khat vek. Sevilla lam hian player chhuahtir nei se chuan he transfer chungchang sawi hi a dik ang - mahse, tunah chuan engmah a awm lo," a ti.

Tu nge chhuak ang?
Blues-in nipui transfer-ah player an chhuahtir nual tawh a, Scottish player ṭhangduang Billy Gilmour chu loan-a an chhuahtir laiin Willy Caballero, Fikayo Tomori, Victor Moses, Olivier Giroud, Izzy Brown, Danilo Pantic, Jamal Blackman leh Marco van Ginkel te chu a nghetin an chhuahtir tawh bawk.

Anni bakah hian Callum Hudson-Odoi, Ruben Loftus-Cheek, Kenedy, Ross Barkley, Davide Zappacosta, Michy Batshuayi, Danny Drinkwater, Baba Rahman, Tammy Abraham leh Marcos Alonso te chu Blues chhuahsan tura ngaih an ni.

Odoi hi Bayern Munich nen sawizawm ni mah se Stamford Bridge-a cham a, hmun chang tura beih a duh zawk nia sawi a ni a, Tuchel-a'n Loftus-Cheek hma hun chu ama kuta innghat a nih thu a sawi a, winger Kenedy hi Kounde mana kaltir Chelsea-in pawi ti lo a, Flamengo lamin an hel mek bawk. West Ham leh Everton ten Barkley an duh a, Inter leh Fiorentina ten Zappacosta an duh thung.

Turkish club Trabzonspor-in Batshuayi an duh a, Drinkwater-a'n pre-season a hman ṭhat avangin ngaihzawn a hlawh thar a, Rahman hi Augsburg nen sawizawm a ni a, West Ham-in Tammy Abraham an duh a, Alonso hi Lukaku emaw Kounde mana kal tel thei reng a ni bawk.

Blues leh season thar
Tuchel-a'n Champions League-a Chelsea a champion pui kha tihpalh a ni lo tih pholan a duh a, a player rim ho enin club lamin sum thehchhuah an ui dawn lo tih a lang chiang bawk.

Blues hi West Ham midfielder Declan Rice leh Monaco midfielder Aurelien Tchouameni te nen pawh sawizawm an ni a, a khawi emaw zawk zawk hi an lalut a nih pawhin sum thehchhuah tam a ngai ang.

Chelsea hian pre-season pawh duhawm takin an hmang a, Bournemouth leh Arsenal lakah 2-1 ve vein an chak a, zanin dar 12:15-ah Tottenham Hotspur nen season thar inbuatsaih nan friendly match an khel leh dawn bawk.

Tuchel-a naute hian UEFA Super Cup hmangin season bul an ṭan dawn a, August 11 zanah Europa League champion Villarreal nen nomawi an inchuh ang. Premier League-a an match hmasa ber chu August 14 zan dar 7:30-ah an khel ang a, Crystal Palace an mikhual ang.