Spurs leh Romero inrem hnai

Tottenham Hotspur chuan Atalanta centre back Cristian Romero an lalut hnai ta a, he thu ziak i chhiar meuh chuan an inlalut fel tawh hial mai thei.

Football journalist lar Fabrizio Romano chuan Spurs hian euro maktaduai 50-in Argentine defender hi an lei chhuak dawn niin a sawi a, a hmawr an bawk dawn tawh.

Atalanta hian Romero hralh lawk duh loh chhan pakhat an nei a, a chhan langsar nia an sawiah chuan a hmun ruak luah tur neih chian phawt an duh, tih hi a ni.

Serie A club hian Juventus defender Merih Demiral, Lazio centre back Luiz Felipe leh Bologna centre back Takehiro Tomiyasu zinga a tu emaw ber hi lakluh theih an inbeisei.

Kum 23 mi Romero hian season hmasa khan Atalanta tan inelna hrang hrangah match 42 khelin goal thum a khungsak a, assist vawi nga a nei bawk.

Argentine club Belgrano aṭanga a career ṭantu hi season hman zawh takah khan Serie A -a defender ṭha berah thlan a ni a, Copa America-ah Argentina a champion pui zui.

Argentina international hi an ram team squad-ah a tel a ni satliah lo a, an champion theih nana player pawimawh niin Copa América Team of the Tournament-ah a lang phak hial a ni.

Harry Kane-a chhuah duh thu thuthang karah Spurs-in inthuam ṭhat hna an thawk ve reng a, Atalanta aṭang hian keeper Pierluigi Gollini chu season khat chhung atan loan-in an hawh tawh.

Sevilla winger Bryan Gil chu pound maktaduai 21.6 leh Erik Lamela pe tel chungin an lalut tawh a, player chhuanvawr Son Heung-min-a'n contract thar a ziak tawh bawk - coach thar Nuno Espírito Santo hnuaiah indinthar an tum hle.