Nadal a inkhel thei leh tawh

Thla hnih deuh thaw a inkhelh loh hnuah Rafael Nadal chu tennis court-ah a lo kir leh dawn ta. Spanish tlangval hi tun kar chhunga khelh tur Washington Open-ah a inlan dawn.

French Open aṭanga a tlak hnuah Nadal hi a la inkhel leh lo. Wimbledon aṭanga a inhnuhdawh bakah Tokyo Olympic 2020 a khel lo bawk, a ke hliam a dam tawh a, tunah chuan ṭha pangngai vekin training pawh a zawm leh thei tawh a ni.

Kum 35 mi Nadal chuan, "Ka inkhel leh thei tawh tur hi ka hlim takzet, tun hma lama nuam leh ṭha taka tennis ka khelh ang khan khelh theih leh ngei ka duh - khatiang game kha Washington-ah hian lantir ka duh.

"Wimbledon leh Tokyo Olympic ka khelh loh chhan kha ka taksa dinhmun ṭhat tawk loh vang a ni a, tunah chuan harsatna ka nei tawh lo. Ke na vangin ni 20 chuang ka chawl tawh a, tunah chuan training pawh darkar khat chuang ka nei thei tawh," tiin a sawi.

Spanish star hian Grand Slam title 20 a la tawh a, a elpui Roger Federer leh Novak Djokovic te nen major title an neih hnem lam a inzat. Tun thla tawp aṭangin US Open an khel leh dawn, inelna hi a la ngaihnawm zawm zel ang.

US Open vawi thum champion tawh Nadal chuan, "Nikum khan hri leng vangin US Open ka hmachhawn lo, kuminah erawh boruak ṭha zawk a lo inher chhuak a, player zawng zawng nuamti taka kan khelh theih ka beisei," tiin a sawi.

Season hmasa khan French Open khelh hun sawn a ni a, US Open nen a inhnaihchilh vangin Nadal hi a inlan lo. Kuminah erawh New York khawpuia inelna hmachhawn ngei turin a inbuatsaih mek - tuna a khelh tur Washington Open hi a hmunah stadium khatin entu an awm thei ang.