Premier League khuh hawnna Community Shield

FA Community Shield hi tun hma chuan Charity Shield tih ṭhin a ni a, Premier League leh FA Cup champion ten an khel ṭhin. English domestic football season-ah chuan nomawi chawi theih hmasa ber a ni a, Wembley Stadium-a khelh ṭhin a ni.

Kumin Community Shield hi August 7, Inrinni zan dar 9:45 hian Leicester City leh Manchester City ten an khel dawn. Foxes hian FA Cup final-ah Chelsea hnehin nomawi an chawi a, Pep Guardiola hote erawh Premier League champion an ni thung.

Season liam ta khan Community Shield hi Arsenal-in an chawi a, FA Cup champion hi Premier League champion Liverpool nen 1-1 an inhnehtawk hnuah penalty shootout hmangin hnehna an chang.

Premier League hi August 13, Zirtawpni zan dar 12:30 aṭangin khelh ṭan a ni dawn a, match hmasa berah kai thar Brentford leh Arsenal te an inkhel ang. Champion lai Man City-in August 15, Pathianni zan dar 9:00-ah Tottenham Hotspur an hmachhawn dawn a, club pahnih hi Harry Kane chungchang vangin an chanchinin ngaihven a hlawh mek.

Nipui transfer hun hmang ṭha Manchester United-in August 14, Inrinni tlai zan dar 5:00-ah Leeds United an mikhual dawn a, zan dar 7:30-ah Chelsea leh Crystal Palace an inkhel ang. Liverpool-in Virgil van Dijk hoin season bul an ṭan thei dawn a, August 14, Inrinni zan dar 10:00-ah Norwich City an hmachhawn ve bawk ang.