Solskjaer-a'n goalkeeper buaina a chingfel thei ang em?

Manchester United-in season liam ta khan David de Gea leh Dean Henderson an kawl a, season ṭantirh lamah Spanish keeper De Gea chu number 1 ni mah se season tawp lamah English keeper Henderson chu number 1-a ngaih theih a ni thung.

Season tawp rualin Man United goalkeeper buaina hi chinfel tawhah ngaih theih a ni a, chutihrualin Dean Henderson-a'n Covid-19 vanga first team training a la zawm theih loh avangin Ole Gunnar Solskjaer tan thutlukna siam a harsa leh dawn.

Henderson-a dinhmun
Henderson hi Euro 2020-ah khan England squad-ah telh a ni a, Three Lions-in match hmasa bera Croatia an hmachhawn ṭum pawhin bench-ah a ṭhu. Amaherawhchu Henderson hi khel bawr hliam vangin Euro squad aṭangin a inhnukdawk.

Kum 24 miHenderson chuan, "Nitinin hma ka sawn zel a, kartawpa Preston nen kan inkhelh hunah ka inlan theih ka beisei," tiin a sawi a, amaherawhchu Covid-19 vangin Preston North End nena an inkhel tur hi an ṭhulh. Thawhṭanni khan Man United-in thuchhuah thar an nei leh a, Henderson-a'n Covid-19 a kai avangin Scotland-a team training a zawm thei loh thu an puang.

Man United chuan, "Dean Henderson chuan Covid-19 vanga inenkawl a mamawh avangin Scotland-a team training a zawm dawn lo. Kar thum liam ta khan Covid-19 hi a kai a, a training thuai theih kan beisei," tiin thuchhuah an siam.

De Gea ve thung
Kum 30 mi David de Gea hi Euro 2020 khel turin Spain tan koh a ni a, Luis Enrique-a'n Unai Simon a rin zawk avangin vawi khat mah a inlan lo. Spanish keeper hian kumin March thla khan fanu thar a nei a, chawlh a lak chhungin Henderson-a'n a ai lo awhin first keeper dinhmun a chân zuiah a ngaih theih.

Chutihrualin Europa League-ah erawh De Gea a inlan chhunzawm a, final-a Villarreal an hneh loh ṭumin Spanish keeper hian penalty pet goal loin an chak lo. Europa League-ah hian Man United-in second keeper zawk an chhawr ṭhin a, Jose Mourinho hnuaia nomawi an chawi ṭum pawh khan champion puitu keeper chu Sergio Romero a ni.

Henderson rawn let hun hi hriat chiah lo mah se David de Gea erawhin training a zawm leh tawh. Spanish keeper hian no. 1 chanlet tumin a chawlh hun ti tawiin a let hma nia sawi a ni a, English keeper vanduaina hi atan hun remchang a ni thei ang.

Khaikhinna
Season liam ta khan De Gea hi Premier League-ah vawi 26 a inlan a, goal 32 chhuahin vawi kua clean sheet a nei. Spanish keeper inlan ṭumah hian Man United hi vawi 12 an chak a, vawi nga an chak lo thung.

Dean Henderson hi vawi 13 a inlan a, vawi li clean sheet a nei. English keeper inlanna inkhelah Man United hi vawi 10 an chak a, vawi khat chiah an chak lo. Hei chauh hi a ni lo, Henderson hian goal 12 chauh a chhuah.

Record en mai chuan Man United keeper Henderson chu thlanawm zawk a ni a, amaherawhchu De Gea hi chhuahtir dawn pawh ni se a hlawh a tam avangin la thei tur club an awm meuh lo ang. Chutihrualin Covid-19 a la reh miau lo avangin rin tlak keeper pahnih neih erawh a sual lo.

Engtin zel?
Man United hian season liam taa Premier League squad-a an dah loh goalkeeper Sergio Romero leh Joel Castro Pereira te chu an chhuahtir a, chutihrualin third keeper Lee Grant an la chelh a, veteran keeper Tom Heaton a lalut bawk.

Man United academy chhuak Heaton hi kum 35 mi a ni tawh a, Aston Villa-ah a inhliam chhungin Emiliano Martínez-a'n dinhmun a sawh nghet a, khelhna hmun a chang ta lo. Chutihrualin Man United-in Heaton an lak chhan hi an goalkeeper ṭha pahnih zinga pakhat chhuah palh a, inven nana an tih a ni.

Premier League leh Champions League-ah chuan Heaton tan chance a awm a rinawm lo a, chutihrualin League Cup velah chuan khelhna hun a awm thei ang. Kum 38 mi Lee Grant erawh keeper dangte training pui tur atan a pawimawh a, a contract a zawh hunah club coaching staff zawm turah a ngaih theih.