US keeper Naeher a inhliam

United States hmeichhe goalkeeper Alyssa Naeher chu Tokyo 2020 football semifinal-a Canada nen an inkhelh ṭuma a inhliam avangin bronze medal match-ah a inlan thei dawn lo. August 5, Ningani tlai dar 1:30 hian pathumna hi zawn tur a ni a, US leh Australia te an inkhel ang.

Kum 33 mi Naeher hi semifinal minute 22-naah Julie Ertz nen boruakah ball an inchuh a, a tlak sual avangin a khupah hliam a tuar. Khelmualah rei tak enkawl a ni a, a khelh chhunzawm theih tak loh avangin minute 30-naah Adrianna Franch-i'n a thlak.

Naeher chuan, "Ningania bronze medal inchuhnaah ka inlan thei dawn lo a, pawi ka ti hle. Chutihrualin kan chak lohna aṭangin kan thawhchhuah ngei ka ring. Inkhelh hun ka nghakhlel a, ṭhut hmun aṭangin ṭang takin ka lo thlir ang," tiin a sawi.

Hmeichhe final hi August 6, Zirtawpni zing dar 7:30-ah khelh a ni dawn a, Sweden leh Canada te an inhmachhawn thung ang.