Olympic mipa football final-ah Brazil vs Spain
Olympic mipa football-ah champion lai Brazil leh team ṭha Spain te an inhmachhawn dawn a, 'final duhthusam' tiha sawi theih a ni ang. Gold medal inchuhna hi August 7, Inrinni tlai dar 5:00-ah khelh tur a ni a; August 6, Zirtawpni tlai dar 4:30-ah Mexico leh Japan ten bronze medal an inchuh ang.
Nimin tlai semifinal inkhel pahnih a hmuhnawm hle. Brazil-in penalty shootout hmangin Mexico 4-1 in an hneh a, hun pangngaiah goal a lut lo. Spain leh Japan te hun pangngaiah 0-0 in an inhnehtawk a, extra time-ah La Roja tan Marco Asensio-a'n minute 115-naah chakna goal a khung.
Penalty-ah Brazil
Kashima-ah champion rinkai Brazil-in beisei an pha lo a, Mexico an ṭha ve bawk nen an inkhel tawk hle. Hun pangngaiah captain Dani Alves cross chu Richarlison-a'n goal ban a tauh per a, a bak chance ṭha dang a tam lo.
Penalty hmangin chak zawk zawn a ṭul a, Mexico-in kum 36 mi Guillermo Ochoa an kawl avangin chance ṭha tak an neiah a ngaih theih. Amaherawhchu Ochoa-a'n Brazil aiawha penalty pet mi pali Dani Alves, Gabriel Martinelli, Bruno Guimaraes leh Reinier te penalty lama a dive dik vek chungin pakhatmah a dang lo.
Boruak sangah Mexico an talbuai a, Eduardo Aguirre-a'n pet hmasa berin keeper Santos-a'n a dansak. A pahnihna pen chhuak Johan Vasquez-a'n goal ban a pet per a, Carlos Rodriguez goal khungin awmzia a awm ta lo. Mexico midfielder Uriel Antuna chuan, "Chak loh mah ila Bronze medal beisei tur kan la nei a, theithawp kan chhuah zel ang," tiin a sawi.
Spain an vannei
Saitama-ah inelna thlengtu Japan leh Spain ten football hmuhnawm an khel a, inkhelh ṭantirh lamah Samurai Blue che ṭha mah se inkhel thununtu erawh player nei ṭha zawk La Roja an ni.
Hun pangngaiah Spain-in penalty hmuah an inngai a, amaherawhchu VAR hmanga en let hnuah referee-in a hnukkir. Extra time khelh a ni a, Spain-in an squad chhahna an hmang ṭangkai.
Bench aṭanga lut Real Madrid midfielder Asensio-a'n box chhung dinglam aṭangin mawi zetin a hlai lut a, minute 115-na a nih tawh avangin Japan tan sut ngaihna a awm tawh lo. Spain-in Barcelona 1992 hnuah gold medal lakna hun ṭha an nei a, an hmaa ding tur chu Brazil an ni.