Basketball-ah United States-in semifinal an lut

Olympic basketball mipa quarterfinal-ah United States chuan Spain 95-81 in an hneh a, semifinal an lut. Champion rinkai US hian August 5, Ningani chawhma dar 9:45 hian Argentina 97-59 a hnehtu Australia an hmachhawn ang.

Semifinal hnuhnung zawkah Germany sawptu Slovenia leh France an inkhel dawn. France hian nimin tlai khan Italy 84-75 in an hneh a ni.

Saitama Super Arena-ah Spain-in bul an ṭan chhe lo a, kum 41 mi Pau Gasol leh a nau Marc Gasol te hoin first quarter-ah 21-19 in hma an hruai. Quarter hnihnaah US an insiamṭha a, halftime-ah 43-43 a ni.

Inkhel chawhnu lamah erawh US an chungnung ta zawk a, Spain tana Minnesota Timberwolves point guard Ricky Rubio-a'n point 38 zet a neih chuan awmzia a nei pha lo.

United States tan Kevin Durant-a'n point 29 a nei a, squad a chhah bawk avangin point a insemrual. Jasyson Tatum (13), Jrue Holiday (12), Damian Lillard (11) leh Zach Lavine (10) ten double digit an nei pha vek.