India hockey team vanduai Bronze medal an la beisei
Mizo nula Lalremsiami Hmar telna India hmeichhe hockey team chu Argentina lakah 2-1 in an chak lo. Tokyo Olympic 2020 neih laiah India hian final lut zo lo mah se Great Britain nen bronze medal match an la khel leh ang.
Nimin tlai semifinal inkhel hmuhnawm takah world number 9 India hian Gurjit Kaur hmangin goal nei hmasa mah se, world number 2 Argentina lamin Maria Barrionuevo-i goal hnih hmangin an chhang let.
August 6, Zirtawpni zingah India hian Britain nen bronze medal an inchuh ang, tlai lamah Netherlands leh Argentina ten gold medal an inchuh ve leh thung dawn. Remsiami-te team tan Olympic medal la tur chuan match khat chak a la ngai.
A hmuhnawm
India lamin penalty corner an hmuh hmasak berah an khung nghal, minute hnihna lekah defender Gurjit Kaur chuan keeper leh defender inkarah tak a thai lutin India hma a hruai pui, an match hmasa lam aiin goal hmaah an hriam dawn niin a lang.
Team ṭha leh ball thiam Argentina lamin ball chang tam mah se goal hmaah an che fuh thei lo, group match tawp lam aṭanga khel fuh laklawh India tlarhnung an inrem phui ṭha viau.
Quarter hnihnaah Argentina lamin na takin an nawr nghal, penalty corner hmasa zawk chhawr ṭangkai thei lo mah se a vawi hnihnaah Barrionuevo-i'n a khung, a dang tura tlan chhuak Remsiami tan dan hman a ni lo.
Chawlhlawk hman hnuah Argrentine lam an hlauhawm, tawnhriat nei ṭha Barrionuevo bawkin penalty coerner aṭangin a khung - goal luh danah India hian 'foul' awmah an ngai a, video assistant refree (VAR) hmanga endik a nih hnuah erawh an pawm.
Kolasib nulain huaisen takin an khingpui goal lamah ball a lalut ngam a, free hit a hlawh chhuak. Ball kal zelah Siami hian angle zim takah remchang hmu mah se goal a ball thai chu goal zawnah a kal lo.
A uiawm
January thla khan India hian Olympic inbuatsaih nan Argentina hi an zin chilh a, an senior team bakah B team leh Youth team te nen match sarih an khel - South America ram lakah India hian chak ni hmel an hmu lo.
Coach Sjoerd Marijne-a'n an khingpui team ṭhatzia a hrechiang, amaherawh chu a hlau duh bik lo a, inveng tak chungin an nawr ngam. Australia an hmachhawn ṭum angin inven reng theih erawh a ni lo, goal hnih an chhuah hnuah nawr let viau mah se a harsa tawh.
Thenzawl Hockey Training Center aṭanga inzir chhuak Remsiami'n captain Rani Rampal tana a ball pek a na hret a, hun tawp dawnah forward Navneet Kaur-i khung tur chu keeper in a lo dansak bawk.
Haryana nula Kaur hian amah vengtu defender karah ball a vaw per hman a, ball a vuak dawn hian amah vengtu defender chu a foul niin a lang. VAR hmanga en nawn a nih hnuah erawh India hi an beisei ang penalty corner pek an ni lo, hun a tawp zui.
Dutch team an ṭha tawk
Nimin zing khan Tokyo Olympic 2020 hmeichhe hockey semifinal hmasa zawk khelh niin, world number 1 Netherlands chuan Great Britain chu 5-1 a sawp chungin final an lut - champion lai Britain tan an gold medal kawl lai hum theih a ni ta lo.
Team pahnih hi 2016 Rio Olympic final-ah khan an lo intawng tawh, tunah erawh thawnthu a danglam ta. Dutch team lamin a tir aṭangin inkhel an thunun tluan chhuak zak a, hnehna chang turin harsatna an nei lo tiin a sawi theih.
Marloes Keetels, Maria Verschoor, Felice Albers ten goal khat ṭheuh an khung hnuah, champion lai Britain lamin Giselle Ansley hmangin si phurh an sut ṭhen a, mahse Frederique Matla-i'n khung belh lehin an chak a nemnghet.