Lovlina Borgohain tawpna bronze

Assamese boxer Lov-lina Borgohain chuan Olympic a hmachhawn hmasak berah bronze medal a la. Lovlina hian welterweight (69kg)-ah semifinal a lut a, nimin khan Turkish boxer Busenaz Surmeneli lakah 5-0 a chak loh avangin bronze medal-ah a lungawi a ṭul ta a ni.

Tokyo 2020-ah hian India-in boxer pakua a tir a, mipa boxer panga zingah medal la pha an awm lo. Hmeichhe lamah Mary Kom a vanduai a, boxing aiawhin kum 23 mi Lovlina hi a rawn pen chhuak.

India hian Rio 2016-ah khan boxing-ah medal a la lo a, Lovlina hian Vijender Singh (2008) leh MC Mary Kom (2012) te hnung zuiin Indian boxer zinga Olympic medal la thei pathumna a ni.

Tokyo 2020-ah Manipur weightlifter Mirabai Chanu-i'n silver a la a, badminton hmeichhe singles-ah PV Sindhu-i'n bronze medal a rawn la, Lovlina hian India tana medal pathumna a rawn la. India hian Olympic neih mekah medal a la lak belh dawn a, wrestler Ravi Kumar Dahiya chuan mipa 57 kg freestyle-ah final lutin a chhe berah silver medal a la dawn tih a chiang tawh bawk.