Oranje coach thar Van Gaal

Netherlands-in head coach atan Louis van Gaal an lalut a, Manchester United manager hlui hian an ram team hi a vawi thum enkawlna tur a ni.

Euro 2020-ah Oranje-in last 16-ah Czech Republic an hneh lo a, Frank de Boer-a'n a hna a chan zui. Kum 69 mi Van Gaal hian De Boer hi a thlak ang. Van Gaal hian kum 2000-2002 khan Netherlands hi a enkawl tawh a, 2012-2014 khan Oranje hi enkawl lehin World Cup 2014-ah pathumna a nihpui.

Manager ropui Van Gaal chuan, "Ka thinlung hi Dutch football nen hian a inhnaih reng a, national team enkawl hi hma kan sawn theihna tur pakhat a ni. Qualifier match kan hma lawkah a awm a, inpuahchahna hun ṭha kan ngah loh avangin kan player thlan tur leh kan khelh dan tur kan duan fel ran a ṭul ang," tiin a sawi.

Van Gaal hian Europe club lian Ajax, Barcelona, Bayern Munich leh Manchester United te a enkawl tawh a, nomawi 20 chuang a chawi tawh zingah Champions League pawh a tel. English club hian kum 2016 khan FA Cup an champion zawhah an ban a, Van Gaal tun hi Man United a enkawl hnua team a kaihhruai lehna hmasa ber tur a ni.