Olympic-ah Australian infiammite an che mawi lo

Australian Olympic Committee chuan an infiammi ṭhenkhatte chu Tokyo Olympic-a a thlenna hotel leh haw kawngah mawi lo taka an chet thu an sawi a, hremna erawh lekkawh an tum lo thung.

Tokyo-a Olympic neih mekah Australian football team leh rugby team-a player ṭhenkhat chuan an thlenna hotel-a khumte tichhiain, an hotel room bangte an tichhia a, an hawna lama thlawhtheihna chhungah ṭhenkhat chu mawi lo takin an che bawk.

Mahse, Australian team chef de mission Ian Chesterman chuan player-ten ngaihdam an dil tawh avangin hremna an lekkawh loh tur thu a sawi a, player-te chetna chu thil lian tham a nih loh thu a sawi bawk.

Chetserman hian infiammite hming emaw, eng infiamna huang ami nge an nih a puang lem lo a, hetihlai hian Australian Olympic Committee chuan Australian football leh rugby thuneituten an player-te an chhui tur thu an sawi thung.

Olympic-ah hian Australian mipa rugby team chu quarterfinal-ah Fiji hneh loin an tlawm a, mipa football team chu group stage-ah an tla fel thung - hmeichhe football team erawh USA nen bronze medal inchuha inkhelh an la hmabak a, buaina siamah an tel lo ang tih a rin theih.