Rangers an chak lo

Champions League group stage khelh tum Rangers-in qualifying round-a an match hmasa berah hnehna an chang lo a, an mikhualna ramah Swedish club ṭha Malmo chu 2-1 in an ngam lo.

Sweden rama inkhelah hian first half chhungin team pahnihin goal an khung lo ve ve a, second half ṭan aṭanga minute hnih chhungin Malmo tan Soren Rieks leh Veljko Birmancevic ten goal khat ve ve an rawn khung thung.

Malmo hian an goal hnih hi an chakpui mai dawn niin a lang hman a, mahse, hun pek belh minute nganaah Steven Davis chuan si phurh a rawn sut ṭhen a, Rangers tan goal khat hlu tak a rawn khung - a tawpah 2-1 in Malmo an chak.

Rangers coach Steven Gerrard chuan, "Result lawmawm a ni lo a, mahse, 2-0 a tlawm ai chuan a la ṭha zawk cheu a ni. Kan inkhelh leh hunah hmasawn kan mamawh a, mimal leh team angin hmasawn kan ngai.

"Ka ngaihdan dik taka sawi dawn chuan ka player zinga paruk emaw pasarih emaw kha chuan hmasawn an mamawh a, intuaihriam an ngai a ni," a ti.

Gerrrad hian a ṭhat dan berin a team a rem thei lo - Alfredo Morelos chuan Copa America a khelh zawh hnuah team training a la zawm theih loh avangin chhawr a la rem lo a; Glen Kamara, Kemar Roofe leh Leon Balogun te chu hrem an ni a, league match hmasa bera Livingston laka inhliam Ianis Hagi chu bench-ah a awm bawk.

Rangers hian Inrinni zan dar 5:00-ah Dundee United nen league match an khel leh phawt ang a, August 10, zan dar 12:30-ah second leg khel turin Malmo hi an mikhual ve leh ang.

Scottish champion Rangers inlanna hi third round a ni a, Malmo hi an paltlang thei a nih chuan playoff-round an lut leh ang a, heta an chak leh chuan group stage an khel ve thei dawn chauh a ni.