US Open beiseitu Alexander Zverev

Tokyo Olympic mipa tennis champion Alexander Zverev chuan inrintawkna a neih san thu a sawi a, tun hma lama a la tih theih ngai loh Grand Slam nomawi chawi theih thawh ngei pawh a in beisei sang hle.

German tlangval hi player ṭha bik zinga mi a ni. 1000 Masters, ATP Finals leh Olympic gold medal meuh a la tawh, mahse beiseiawm tak ni ṭhin mah se major title erawh a la hlawh chhuak thei lo.

Kum 24 mi Zverev chuan, "Tunah chuan hahdam leh rilru engthawl taka hun hman ka duh, a hnu lamah chuan US Open atan rilru ka sawrbing leh ang," a ti. US Open hi August 30 aṭangin an khel ṭan ang.

World number 5 Zverev hian 2020 US Open-ah khan final a lut, mahse a ṭhian leh elpui ni bawk Dominic Thiem a ngam lo - kuminah hian a inlan leh a nih chuan thleng sang tura rinkai zingah a tel leh dawn.

Grand Slam bik hi set nga khelh a nih avangin tournament dangte aiin a danglam a, tun hma lama a sulhnu en chuan Zverev hi a dawhthei tawk lo ṭhin, tun hnaiah erawh a khelh dan leh rilru put hmang pawh a danglam chho mek a ni.

Zverev chuan, "Hlawhtlinna lian leh langsar tak tak chu ka lo chang ve tawh, ka tan an hlu em em vek. Chutih rualin Grand Slam hi ka thil tum lian leh langsar a la ni reng, engtik niah emaw chuan ka la hlen chhuak ve ngei ang," tiin a sawi.