McLaughlin tan gold medal

United States nula Sydney McLaughlin chuan Tokyo Olympic 2020 hmeichhe 400m hurdles huangah gold medal a dawng, 400m hi second 51.46 chhunga thlengin world record a siam nghal bawk a ni.

Kum 21 mi McLaughlin hian Olympic champion lai Dalilah Muhammad a hneh, amah ang bawka US aiawhtu Muhammad hian silver medal dawng turin 51.58secs hun a mamawh thung - pathumnaah Netherlands nula Femke Bol a thleng.

Dutch star Femke Bol pawh hi world champion ni lai a ni a, tun ṭumah hian 52.03 secs hun a hmang - Femke Bol leh Muhammad te hi rinkai leh ṭha fal tak ni mah se Japan khawpuiah chuan McLaughlin an tluk lo.

June thla khan US-ah McLaughlin hian inbuatsaihna an neih laiin 400m hurdles hi 51.90secs chhungin a thleng, hei hi world record a ni phak. Olympic-ah erawh a record hmasa hi amah bawkin a rawn khum.

McLaughlin chuan, "World record ka siam tih ka hria a, a mak zawk hle mai. Tun dinhmunah chuan eng tiang taka lawm tur nge tih pawh ka la hrethiam lo zawk. Intlansiak nuam leh ropui a ni tih chu ka hria.

"Tlan ringawt a ni ni lo, zuan khum tur a lo awm chiah khan inelna tak tak chu a inṭanah ka ngai. Engkim kha ka duh leh beisei anga a thlen theih avangin ka lawm," tiin a sawi.