India-in wrestling-ah medal la dawn

Olympic-a India-in medal a lakna ṭhin pakhat chu wrestling hi a ni a; 2008 Beijing-a Sushil Kumar-a'n bronze medal a lak hnu khan Olympic apiangin India-in medal a la ziah. Tokyo 2020-ah pawh India tan wrestling-a medal beiseina a san ang ngeiin an la dawn.

Nimin khan Haryana wrestler Ravi Kumar Dahiya-a'n mipa freestyle (57kg) final a luh avangin a chhe berah silver medal a la thei dawn. Kum 22 mi Deepak Punia erawhin David Morris Taylor a hneh loh avangin 'repechage round' a khelh leh a ṭul ang.

Wrestling leh medal
Delhi tlangval Sushil Kumar-a'n Beijing 2008-a bronze medal a lak hnuin London 2012-ah India flag kengtu a ni a, silver medal a hawn.

Kum 2012 hian Haryana wrestler Yogeshwar Dutt-a'n 60 kg freestyle-ah bronze medal a la. Olympic hnuhnung berah India-in medal pahnih chiah an la a, PV Sindhu-i'n badminton-ah silver a la a, medal dang pakhat leh chu Indian wrestler Sakshi Malik a ni.

Haryana nula Sakshi Malik hian quarterfinal-ah Valeria Koblova a hneh lo a, amaehrawhchu 'repechage round' hmangin medal lakna kawng a inhawng. India hmeichhe wrestler zinga medal la hmasa ber ni turin Pürevdorjiin Orkhon leh Asian champion Aisuluu Tynybekova te a hneh.

Repechage round?
Boxing-ah chuan semifinal luh chuan medal a chiang nghal a, a chak lo zawkin bronze medal an la mai ṭhin. Wrestling-ah erawh 'repechage round' hmangin bronze medal zawn ṭhin a a ni.

Wrestling-ah hi chuan an hneh lohten final an lut a nih chuan 'repechage round' hmangin bronze medal an chuh leh thei. Repechage round-ah hian finalist pahnih laka chak lote bronze medal inchuhin an inkhel kual ṭhin tihin a sawi theih bawk.

Repechage round-ah hian wrestler-te chu ground hniha ṭhen a ni a, group khatah finalist pakhat laka chak lote chu dah khawm an ni a; group dangah finalist pakhat zawk laka chak lote chu dah hran leh an ni.

Group pahniha pakhatna ve ve hnenah bronze medal an hlan ve ve ṭhin. Indian wrestler Sushil Kumar, Yogeshwar Dutt leh Sakshi Malik ten repechage round hi hmang ṭangkaiin medal hi an la tawh.

Gold Beiseina
Ravi Kumar Dahiya hian final thleng turin Oscar Tigreros (13-2), Georgi Vangelov (14-4) leh Nurislam Sanayev (7F-9) te a hneh. Semifinal-a Ravi Kumar khingpui Nurislam Sanayev hi World Championships-a medal pahnih la tawh a ni a, Indian wrestler hian first period-ah 2-1 in hma hruai mah se second period-ah Nurislam hian 9-2 in hma a hruai hman.

Kum 23 mi Ravi a tlawm duh lo a, 5-9-in Nurislam a hnaih chhoh hnuah Indian wrestler hian Kazakh wreslter hi a kheuh tlu a; point-ah hneh lo zawk mah se 'fall' hmangin a chak.

Ravi hi Sushil Kumar dawta Indian wreslter final lut thei hmasa ber a ni. Final-ah Ravi hian Russian Olympic Committee aiawh Zaur Uguev a hmachhawn dawn a, vawiin tlai lamah gold medal inchuhna hi neih a ni ang.

Mipa an che ṭha
India aiawhin mipa freestyle-ah Ravi Kumar Dahiya bakah Bajrang Punia leh Deepak Punia te an tel. Kum 27 mi Bajrang Punia hi 65 kg category-ah telin a la inlan lo a, India medal beiseina tho a ni.

Deepak Punia hian Ekerekeme Agiomor (12-1) leh Lin Zushen (6-3) te hnehin semifinal lut mah se nimin US wrestler David Taylor erawh a ṭha mah mah. Taylor hi 'technical superiority' hmangin a chak a, Deepak Punia hian bronze medal a la beisei thei ang.

Hmeichhe lam hi

India hmeichhe wrestler pahnih Anshu Malik (57 kg) leh Sonam Malik (62 kg) ten an khingpui Iryna Kurachkina leh Bolortuyaa te an hneh loh avangin an chak lo ve ve. Bolortuyaa hi quarterfinal a tlak zui avangin Sonam Malik tan beisei tur a awm tawh lo a, repechage round beisei tur a awm tawh lo.

Hetihlai hian Anshu Malik hneh loh Kurachkin erawhin final a lut a, Indian wrestler hian repechage round hmangin bronze medal a chuh leh thei dawn. Vawiin hian Vinesh Phogat (−53 kg) a inlan dawn a; August 6, Zirtawpni hian Seema Bisla (−50 kg) a inlan ve leh ang.