Leicester-in Maddison chhuahtir an tum lo

Season thara Europa League khel tur Leicester City-in an player chhuanvawr James Maddison hralh tumna an nei lo a, an hralh a nih pawhin pound maktaduai 60 aia tlawm chuan chhuahtir an tum lo.

Arsenal chuan English midfielder hi lakluh tumin an hel a, loan-a an hawh Martin Odegaard chu Real Madrid lama a kir leh tawh bawk si avangin Maddison hi lakluh an tumruh hle nia sawi a ni.

Mahse, Foxes-in Maddison man zata an chhiar hi a tam hret a, nipui transfer-a pound maktaduai 73 seng tawh Arsenal tan player pakhat lei nana pound maktaduai 60 thehchhuah hi a harsa mai thei.

Hriat tel tur chu Maddison hi kum 24 mi chauh a la ni a, Foxes-ah hian kum thum dang khel turin contract a la nei bawk - hei vang hian Foxes hian an phalna ang zata dawrtu an nei lo a nih chuan hralh loh an pawi ti lo nia sawi a ni.

Leicetser hian Patson Daka, Boubakary Soumaré leh Ryan Bertrand chu nipui transfer-ah an lalut tawh bawk a, transfer bazar an la hmang fuh rih hle.

Kum 22 mi Daka hi Liverpool nen pawha sawi zawm hlawh hman a ni a, season hmasa khan Austrian club Red Bull Salzburg tan inelna hrang hrangah match 42 khelin goal 34 a khung.

French midfielder Soumare pawh kum 22 mi chauh a la ni a, season hman zawh taka Lille-in Ligue 1 nomawi an chawi theih nana player pawimawh a ni - Paris Saint-Germain academy chhuak midfielder hian season hmasaah ringawt khan Lille tan match 43-a khel tling!

Kum 31 mi Bertrand hi English football-ah a mikhual lo. Chelsea, Aston Villa leh Southampton tana Premier League lo khel tawh a nih avangin a tawnhriat ringawt pawh hi chhawr tham a tling dawn.

Foxes hian nipui transfer-ah Wes Morgan (retired), Christian Fuchs (Charlotte FC) leh Matty James (Bristol City) an chan a, season hmasaa loan-a an hawh Cengiz Under chu AS Roma-ah a kir a, Hamza Choudhury chu Newcastle United nen sawizawm mek a ni bawk.

FA Cup champion Leicester hian Inrinni zan dar 9:45-ah season bul an ṭan dawn a, Community Shield-ah Premier League champion Manchester City nen an inhmachhawn ang - an league match hmasa ber chu August 14, zan dar 7:30-ah Wolverhampton Wanderers mikhualin an khel ang.

Leicester hian nizan khan season inbuatsaih nana an match tawp ber chu Villarreal CF nen an khel a, he thu buatsaih a nih lai hian result kan hre hman lo - a hma an pre-season match-ah Burton Albion (3-1, penalty), Wycombe Wanderers (0-1) leh Queen Park Rangers (3-3) hmachhawnin hun pangngaia chak an nei lo.