Fabinho-a'n kal bo a tum lo

Liverpool midfielder Fabinho chuan Anfield chhuahsan tumna a la nei lo tih contract hmangin a lantir a, Reds tana kum 2026 thleng khel turin contract thar a ziak.

Kum 27 mi Fabinho hian May 2018 khan Monaco aṭangin Liverpool hi a zawm a, hetihlaia a man zat hi pound maktaduai 39 a ni - season hmasa kha inhliam tam vangin a hun tam zawk chu centre back-ah a hmang a, a talbuai phah lo.

Fabinho chuan, "Liverpool-a cham a, he club tana khelh chhun-zawm zel hi ka duh chu a ni a, contract thar ka ziak thei hi ka hlim takzet a ni. Season thum chhung hlim takin he club-ah hian hun ka hmang tawh a, manager, staff leh ka khelhpuite aṭangin thil tam tak ka zir belh tawh.

"Hlawhtlinna kan chang ho a, ka ngaihdan chuan he hmuna ka awmna tur atana ṭha ber a ni a, hmasawn zel turte, staff leh player-te aṭanga zir belh zel turtein he hmuna awm hi ka tan a ṭha a ni," a ti.

Brazil international hian Liverpool a zawm hnuah Reds tan inelna hrang hrangah match 122 khelin goal thum a khung tawh a, assist vawi sarih a nei bawk.

Fabinho hian Liverpool a pan hnuah Premier League, Champions League leh UEFA Super Cup-ah te champion nomawi a chawi a, FIFA Club World Cup an champion ṭumah erawh hliam vangin squad-ah a la awm lo thung.

Liverpool hian nipui transfer-ah an player ṭhate thlun ngheh chu thupui berah an nei mek a, Fabinho hma hian Trent Alexander-Arnold chuan contract thar a lo ziak tawh - Alisson, Virgil van Dijk, Mohamed Salah, Sadio Mane, Andy Robertson leh Jordan Henderson te pawh contract thar ziak tura beisei an ni.

Merseyside club hian nipui transfer-ah erawh RB Leipzig aṭangin Ibrahima Konaté an lalut tih loh chu thawm an la nei lian rih lo hle - French defender hi pound maktaduai 36 man a ni.

Liverpoool hian August 14, zan dar 10:00-ah Norwich City lenchilhin season bul an ṭan dawn a, hemi hma hian Athletic Bilbao (August 8, 8:30 PM) leh Osasuna (August 9, 11:30 PM) nen pre-season match an khel leh phawt ang.