City an inbuatsaih ṭha
Manchester City-in transfer bazar-ah an duh ang player lalut thei rih lo mah se pre-season lamah erawh result duhawm an nei zel a, Leicester City nen Community Shield an khelh hmaa an match hnuhnung berah Blackpool chu 4-1 in an sawp.
Pep Guardiola-a'n friendly match mah ni se result ṭha loa pre-season khar a duh lo a, a player neih ṭhat hmangin Blackpool a hmachhawn a, a chhanletna chu goal li zet a ni.
City tan Ilkay Gundogan chuan goal hnih a khung a, rawlthar Sam Edozie leh Riyad Mahrez ten goal khat ve ve an khung bawk a, Blackpool tana Luke Garbutt goal khungin awmzia a nei thui lo.
Blackpool laka bul ṭan zinga hriat hlawh lo Edozie hi chhinchhiah a fuh ang - kum 18 mi striker hian pre-season-ah City match thum khelin goal thum a khung a, English striker hian hmabak a nei êng hle.
City hian season inbuatsaih nan Preston North End (2-0) leh Burnley (4-0) chu Blackpool hma hian an lo hneh tawh bawk a, pre-season an hman danah Pep a lungawi ang.
Transfer bazar lamah erawh City-in player langsar lakluh an la nei lo a, fan-ten hming langsar an lakluh hun an thlir reng - Aston Villa captain Jack Grealish leh Tottenham Hotspur striker Harry Kane nen sawizawm mek an ni.
City hian Grealish-a manah pound maktaduai 100 an phal a, khawthlang media ṭhenkhat chuan nimin lam khan transfer tifel hman tur ang hialin an tarlang - he thuziak i chhiar meuh chuan an inlalut fel tawh mai thei tihna a ni.
Chutihrual chuan City hian Grealish an lalut a nih pawhin number 10 jersey pek mai an tum dawn lo nia sawi a ni bawk. Grealish ang thoa number 10 ha ṭhin Kane chu City hian an dawr mek bawk a, chhuah a duh avanga Spurs training pawh zawm duh rih lo Kane biakna kawnga harsatna a awm loh nan number 10 hi tumah pek rih loh an tum - Barcelona zawm ta Sergio Aguero chuan City number 10 hi a ha ṭhin.
Premier League champion City hian Community Shield an khelh zawhah August 15 zan hian an league match an khel ṭan dawn a, khualmualah Tottenham an lenchilh nghal dawn avangin season bul an ṭan dan a hautak dawn hle.