Hmeichhe football final-ah Canada Vs Sweden

Olympic hmeichhe football final chu August 6, Zirtawpni zing dar 7:30 hian National Stadium, Tokyo-ah Canada leh Sweden ten an khel dawn. Sweden hian an khingpui zawng zawng an la hneh vek avangin champion tura rinkai a ni a, chutihrualin Christine Sinclair kawltu Canada hi sawibo chi an ni lo.

Vawiin chawhnu dar 1:30 hian United States leh Australia ten bronze medal an inchuh dawn a, hmeichhe football tuipui tan chuan hmaih phal chi a ni lo ang.

Tu nge Sinclair chu?
Football inelnaa ram tana goal khung tam ber Christine Sinclair hi football ngainatute tan chuan hmelhriat ve a ṭul a, kum 38 mi Canada captain chanchinah hian zir tur ṭhahnem tak a inhnutchhiah a ni.

Sinclair hi June 12, 1983 khan British Columbia, Canada-ah a piang a, football ngaina chhungkua aṭanga seilian a nih avangin kum li mi chauh a nih aṭangin a inkhel ṭan.

Chutihrualin Canadian a nih miau avangin an rama inlena lar basketball leh baseball a khel ṭhin. Sinclair hian jersey number 12 a ha ṭhin a, chhan neia ha a ni. A naupan lai hian Burnaby mipa baseball league-ah a tel a, kum 11 hnuai lam all star team-ah second baseman anga thlan a ni a, Canadian basetball club Toronto Blue Jays-a second baseman Roberto Alomar a jersey number 12 hriatreng nan he number hi a ni.

A ngaihsanawm
Sinclair hi kum 38 mi a ni tawh a, kum 16 mi lek a nih aṭangin an ram Canada tan a khel pha. Goal khung thei bik player a ni a, ram tan match 303 a khelh tawh aṭangin goal 187 a khung.

A sulhnu ropui tak hi chapo pui tham ni mah se Sinclair erawh chungtiang mi a ni lo a, mi pangngai ang maiin ṭhiante zingah pawh a khawsa. Hun rei tak ram tana a khelhpui ṭhin Diana Matheson chuan, "Tute pawhin ngaihven hlawh hi chu nuam kan tih vek ka ring. Christine hi chu a dang hlak. A ṭawng chhuak lo a, a hna thawh tur a thawk mai a, a hnathawh hi an sawi zui ṭhin," tiin a ngaihsan thu a sawi.

Sinclair-i patea Brian Gant pawhin a fanu hi a chhuang hle. Gant chuan, "Ram tana goal khung tam ber record a siam dawn khan uar taka han sawi sak ve te ka duh a, mah se 'ngawi' turin min ti," tiin a sawi. Canadian forward hian goal khung tam ber record hi January 2020 khan a siam.

Tokyo-a an zin hma pawhin Gant hian medal la ngei turin duhsakna a hlan a, Sinclair chuan, "Medal lam ka ngaihtuah lo. Ṭha taka kan khelh chuan eng emaw chu ka thleng thei ang. Ka vanneihna chu ka khelhpuite hi an ṭha em em a ni," tiin a sawi.

Chutihrualin Sinclair ṭhatzia chu Megan Rapinoe thusawi hian a ti chiang hle. US star hi Ballon d’Or dawng lo zingah tu nge ṭha ber tihin an sawi a, Rapinoe chuan inngaihtuah buai loin, "Christine Sinclair," tiin a chhang.

Final chu
Khawvel hmeichhe player ropui ber zinga mi Sinclair hian gold medal hi hawn ngei se tih hi mi ṭhahnem tak a ngaihdan a ni ngei ang. Mahse, mipa football-ah pawh Lionel Messi leh Cristiano Ronaldo ten World Cup nomawi an la chawi lo a, khawvel goalkeeper ropui ber zinga mi Gianluigi Buffon meuh pawhin Champions League a chawi lo.

Football hi duhthusam thlen dikna hmun a ni lo a, Olympic gold medal hi hlawhchhuah a ngai dawn. Sweden hi team angin an khel ṭha a, goal li khung tawh Stina Blackstenius bakah Fridolina Rolfo (goal 3) leh Lina Hurtig (2) te an kawl avangin Canada hmabak hi a harsa dawn. Chutihrualin Canada hian semifinal-ah match 36 chhung an hneh tawh loh United States an hneh avangin inrintawkna nasa tak an nei ngei ang.