Transfer bazar hmang ṭha PSG; Nomawi a hnai?

Nipui transfer-a hun hmang ṭha ber thlang dawn ta ila, Paris Saint-Germain hi tun dinhmunah chuan a chung ber luah phu tak an ni.

French club hian Italian keeper ṭha mi Gianluigi Donnarumma, Real Madrid captain hlui Sergio Ramos, Liverpool midfielder rinrawl ṭhin Georginio Wijnaldum leh Inter Milan-in Serie A nomawi an chawi nana player thawhhlawk Achraf Hakimi an lalut tawh.

Heng player langsar ho lakluh nana an sum sen zat i hre duh em? Pound maktaduai 50 chuang awrh a ni - Arsenal-in Brighton & Hove Albion defender Ben White lei nan pound maktaduai 50 an seng tih ngaihtuah tel la, i mak tih a zual ang.

PSG hian Hakimi manah chiah sum an seng a, player langsar dang zawng hi man loin an lalut - hei lo liama transfer bazar hmang ṭha a awm theih chuang loh.

Beiseina nomawi
PSG-in season hman zawh takah league nomawi an chawi lo chungin coach Mauricio Pochettino chungah rinna an nghat a, mahse, Argentine coach hoa season bul an ṭanna match-ah an chak zo lo nghal ringawt!

French club hausa hian Trophée des Champions-ah Lille chu 1-0 in an ngam lo a, chutihrual chuan an ṭhat dan berin an la khel lo tih hriat a ṭha - an player lak thar zingah Hakimi chiahin bul a ṭan a, Wijnaldum chu bench aṭanga luhtir a ni bawk.

Donnarumma leh Ramos hmuh tur an la awm lo a, Neymar, Kylian Mbappé, Marquinhos, Ángel Di María leh Marco Verratti te an la inlan lo bawk a, an hming aṭang ringawt pawhin anni ang awm lo chu PSG tan a pawi phak tih a lang chiang.

France mai ni lo, European football pumpui thlir pawhin PSG aia squad nei ṭha zawk anga inchhal thei an tlem ang tih a chiang a, chuvang chuan he team hian tualchhung inelna piahah Champions League chu thupui berah an nei dawn.

Mbappe a nghet?
Khawthlang media-te titi tui ber zinga mi chu striker Kylian Mbappe chhuak tur anga sawi awm hi a ni a, French striker hi Real Madrid nen sawizawm a ni mek - mahse, thuthar berah chuan a chhuak dawn lo niin an sawi.

Kum 22 mi forward hian season zawh rualin PSG-a a contract a hmang zo tawh dawn a, a pawtsei lo a nih chuan season tawpah a thlawnin a duhna lam a pan thei dawn. Hetiang ngaihtuah chuan PSG tan kaltir mai hi thil finthlak a ni.

Mahse, French chanchinbu lar Le Parisien chuan Mbappe-a'n Real a pan loh tur thu leh PSG-a a cham tur thu an tarlang a, Parisien chuan, "July 1-a kan ziah tawh ang khan Mbappe hi PSG-ah a cham dawn a, a bik takin Spain lama hrethiam thei lote khan lo chhiar rawh u," an ti deuh kher!

PSG ṭantute tan chuan Mbappe cham tur anga sawi hi thuthar lawmawm a ni a, chutihrual chuan euro maktaduai 150 man bawr vel forward hi a thlawna a chhuah loh nan kuminah contract thar nen hmin an tum ang.

Ronaldo a nghing
Mbappe cham tur thu sawi a nih ruala rilrua lo awm nghal chu Cristiano Ronaldo a ni - Real Madrid forward hlui hi Mbappe-a'n Real a pan chuan PSG-ah lut nghal tur anga sawi a ni a, French striker a chhuah hmel tak loh avangin Real nen sawizawm zui a ni ta zawk.

Kum 36 mi Ronaldo hi Juventus-ah a nghing nia sawi a ni a, chhuak tur anga sawi thawm a ri ring hle. Mahse, PSG hian Mbappe an chelh chuan an player lakluh thar dangte nen hlawhah an inseng hnem lutuk dawn a, Ronaldo hi an rim chhunzawm dawn lo nia ngaih a ni.

Juventus forward Ronaldo hian PSG a pan lo a, Juve-ah cham a tum bawk si lo a nih chuan a awm ber chu Real Madrid a ni a, Santiago Bernabeu-a a kir leh mai rinna a lian hle.

Real boss thar Carlo Ancelotti leh Ronaldo hi an inhnaih viau a, Portuguese forward hian a career-a mi pawimawh zingah a chhiar tel hial - season tharah 'BBC' Karim Benzema, Gareth Bale leh Cristiano Ronaldo inkawp kan hmu leh ta a nih pawhin a mak lo ang.

Hmabak chu
French football-a inelna sang ber Ligue 1 chu Zirtawpni zan dar 12:30-ah khelh ṭan a ni dawn a, AS Monaco-in tun season league match hmasa ber khelin Nantes an mikhual ang.

August 7, Inrinni zan dar 12:30-ah PSG-in an league zinkawng an zawh ṭan ve leh ang a, khualmualah Troyes an lenchilh ang - season hmasa nomawi an chawi loh avangin tun season-ah pakhatna aia hniama lungawi an tum dawn lo.

Hriatreng tur erawh PSG-in an duh ber chu Champions League nomawi a ni a, European football-ah rorel an duh - tualchhung football-ah chuan nomawi an chawi kim tawh a, an duh ber Champions League nomawi an la chawi thei tlat lo hi an manganna a ni.

Player a nih laia PSG captain hial lo ni tawh Poch-a lam an hawi a, season hmasaa semifinal luhpuitu coach hian European champion a nihpui tawh an beisei ang - a ti thei lo a nih chuan coach hmasate ang thoa chhuahna kawngkhar lam pan chu a hmabak a ni dawn.