'Zo Keite' NT-a'n title fight a nei dawn ta

Professional boxing a luhchilh hnua rei tak a nghah hnuah NT Lalbiakkima'n title fight a nei thei dawn ta - vawiin chhun dar 12:00 hian Marine Centre, Mumbai-ah IBA intercontinental title inchuhin Sandeep Singh nen an inhnek dawn.

Siaha tlangval NT-a chuan, "Rei tak chhung inbuatsaihna ka nei tawh a, January aṭang khan chawlh pawh nei loin training ka nei reng. Inhnek turin ka inpeih tawh a ni," tiin Vanglaini a hrilh a, IBA title hlawhchhuah theih ngei a inbeisei.

NT-a rual hian Mizo boxer Laldingliana chuan a professional fight hmasa ber a hmachhawn ve dawn bawk a, Tuipui tlangval hi professional boxer tuaitir ve tho Vindo Vanteddu nen an inhnek ang - Dingliana hi LPS pro fight bantamweight-a champion lai a ni.

Zinkawng thui
NT-a hian June 8, 2018 khan boxing khawvel barakhaihin a hming a chher a, Siaha boxer hian Olympic champion leh world number 1 ni bawk Hasanboy Dusmatov chu Kazakhstan-a neih President’s Cup-ah a hneh.

LPS pro fight avanga Mizote hriat hlawh boxer kha thawklehkhatah Indian mipuite hriat hlawh a ni a, a chanchin chu media-te titi tui a tling a, bollywood khawvela mi lar tak tak thlengin NT-a hnehna chan hi an fak.

Hetihlaia NT-a rilrua lian ber chu Olympic ni mah se Indian boxing-ah Siaha tlangval hian a beisei ang duhsakna a dawng tawk lo niin a hria a, Navy-a a hna ṭha tak chu bansanin professional boxing a luhchilh.

Hello South Korea!
NT-a hian VN Promotions hnuaiah contract ziak nghalin South Korea-ah intuaihriam turin an tir zui. NT-a'n South Korea a awm laiin theihtawp a chhuah a, WBC Asia title chu a beisei ber a ni.

Mahse, Covid-19 hri len vangin NT-a'n a beisei ang fight a nei hleithei lo a, inbiakfelna an neih hnu pawhin inhnekna tur bawk a tlawlh leh ṭhin - a tawpah VN Promotions nena an thawhdunna a titawp a, Marine Pro Boxing Promotions a zawm zui.

Marine hnuaiah NT-a'n a beisei a hmu thuai a, December, 2020 khan a professional fight hmasa ber a hmachhawn nghal - round khatna lekah technical knockout hmangin a chak a, minute 1 leh second 45 bak chak tur hian a mamawh lo.

Zam ngai lo val
NT-a'n a professional fight vawi hnihnaah title a chuh nghal dawn a, mahse, a zam lo. Mizo boxer chuan, "Ka inbuatsaih rei tawk tawh a, ruahmanna kan kalpuina pawh a rei tawh. Ka zam lo a, hnehna chan ka inbeisei," tiin Vanglaini a hrilh.

Mumbai khawpuia NT-a te inhnek tur hi Covid-19 vangin a hmunah en theih a ni dawn lo a, television lamah pawh pek chhuah a rem dawn lo. IBA title-in India a thlenna a rei tawh a, IBA lamin a rang lama inhnek buatsaih vat tura an tih bawk si avangin ruahman angin thil a kal thei lo.

Marine Pro Boxing Promotions neitu Devraj Das chuan, "Covid-19 avangin Mumbai lamah pawh duh ang takin engmah a kalpui theih loh a ni," tiin Vanglaini hnenah a lo sawi tawh.

Hmachhawp chu
IBA inkaihhruaina danah 'world title' chu a sang ber a ni a, a hnuai chiahah hian 'intercontinental title' a awm leh a, a hnuaiah 'americas title' leh 'international title' awm lehin a hnuai ber hi 'regional title' (South Pacific, Caribbean, European, Latino, African, Middle East & Asian) a ni.

NT-a'n professional huangah tawnhriat a la neih tam tawk loh avangin world title hi a beisei nghal ngawt thei lo a, amateur lama a record ṭhat zar zoin intercontinental title a chuh thei hlauh zawk.

Siaha boxer chuan, "Pathian zarah title ka la ngei turah ka ngai a, chumi zawhah chuan record ka neih ṭhat theih nan fight ka hmachhawn chho zel ang a, ka record-a zirin world title chu ka beisei thei chauh ang," tiin Vanglaini a hrilh.