Hockey hmangin India a mawi Bronze medal an vaw chhuak ta

Dhyan Chand awmna ram, hockey ngaihsanna hmunah Olympic medal a lo kir leh ta. India mipa hockey team chuan Germany 5-4 a hnehin Tokyo Olympic 2020 bronze medal an vaw chhuak.

India hian tun hmain mipa hockey huangah hian tun hmain Olympic gold medal vawi riat ngawt a dawng tawh, Mexico 1968 leh Munich 1972 khan bronze medal a lo dawng tawh bawk - mahse medal dang hlawh chhuak leh turin a ngah rei a ngai vang vang hle.

Hun leh kum tam a liam a, kum 41 a ral leh meuh chuan Olympic medal an dawng ve leh ta. Final lut zo ta lo mah se medal an dawn miau avangin India chuan a mipa hockey team hi a chhuang takzet.

Nimin tlai khan final khelh zui niin, Belgium chuan hun pangngaia 1-1 a nih hnuah Belgium chu penalty shootout-ah 3-2 a hnehin gold medal an dawng ve bawk.

Hnehna chu
Nimin zing bronze medal inchuhna inkhelah Germany lamin Timur Oruz (2') leh Niklas Wellen (24') te hmangin ṭum hnih hma hruai hmasa mah se an ṭang tlang thei lo. An tlarhnung a phui loh avangin Rio Olymnpic anga pathumna nih an tumna chu a thamral.

India tan hian Simranjeet Singh-a'n (17', 34') goal hnih a khung bakah, Hardik Singh (27'), Harmanpreet Singh (29') leh Rupinder Pal Singh (31') te chuan goal khat ṭheuh an khung a, hnehna an chan theih nan PR Sreejesh a khel ṭha bawk.

Hun tawp dawn lamah world number 5 Germany hian si phurh sut tumin na takin an nawr let, mahse kum 35 mi keeper Sreejesh a chiai duh lo - inkhel a tih muan thiam bakah an khingpui goal khung tur ṭha tak takin a dansak a ni.

Inpumpekna
India coach Graham Reid chuan hlawhtlinna an chan chhan chu a nauten an theihna zawng zawng senga an khelh vang a nih thu a sawi. Reid chuan, "Awlsam taka hlawh chhuah a ni lo, tun hun thleng tur hian thil tam tak kan paltlang.

"Ram pumin hockey a ngaih pawimawhzai kan hria, gold medal dawng phak ta chiah lo mah ila Olympic medal kan hlawh chhuak hian mipui a tih lawm ka beisei, khawvela a ṭha bik inelnaa hlawhtlin hi thil awlsam a ni lo," a ti.

Australia tana Olympic silver medal dawng tawhtu Reid hian 2019 aṭang khan India team hi a enkawl ṭan a. Zawi muangin team nghet ṭha tak a din a, world ranking-ah pawh palina nih puiin tunah chuan hlawhtlinna lian zawk an chang ta.