Remsiami te tan chak ngei a ngai

Mizo nula hockey khel thiam Lalremsiami Hmar telna India hockey team chuan tukin dar 7:00 hian Great Britain an hmachhawn dawn. Tokyo Olymnpic bronze medal la tur chuan chak ngei ngei a ngai.

India hmeichhe hockey team hian inelna tir lam an hmang ṭha lo, team ṭha Netherlands leh Germany lakah an mualpho - tun ṭuma an hmachhawn tur Britain ngei pawh group match-ah 4-1 in an ngam lo.

Mahse, group match tawp lam aṭanga insiam ṭhain knock out stage an lut. Team ṭha leh champion rinkai Australia 1-0 in an hneh thei a, world number 2 Agrentina (2-1) an hneh loh dan pawh vanduai vang chauh a ni.

Team pahnih inkhelh tawhna thlir chuan India hi chak lo tura ngaih zawk an ni. Mahse, an insiamṭhat tawh miau avangin team dang daih ang an ni tawh, inrintawkna sang tak nen an khel thei a nih chuan medal an beisei ngam ang.