Ravi Kumar-a'n Silver a la

Nimin khan Indian wrestler Ravi Kumar Dahiya chu mipa freestyle 57kg-ah world champion Zavur Uguev lakah 4-7 in a tlawm a, silver medal-ah a lungawi a ṭul. Tokyo 2020-ah India-in medal panga a la ta a, Rio 2016-a medal pahnih chauh la thei ram tan chuan hmasawnna ṭha tak a ni.

India-in wrestling-ah medal pakhat aia tam lak an inbeisei a, vawiin hian Olympic closing ceremony-a India flag kengtu tur Bajrang Punia a inlan dawn. Asian Games, Commonwealth Games leh Asian Cham-pionships-a gold medal la tawh Bajrang Punia hian 65kg category-ah Kyrgyzstan wrestler Ernazar Akmataliev a hmachhawn ang.

Bajrang bakah hian vawiin hian Seema Bisla chuan 50kg category-ah Tunisian wrestler Sarra Hamdi a hmachhawn dawn. Haryana wrestler Bisla leh Bajrang Punia te hian Ravi Kumar hnung zui an tum dawn a ni.

Deepak Punia chuan 86 kg-ah repechage round hmangin bronze medal inbeisei mah se nimin khan San Marino wrestler Myles Amine hneh loin beisei a tawp. Hmeichhe lamah India beiseina sanna Vinesh Phogat chuan Sofia Mattsson chu 7-1 in hneh nghal mah se quarterfinal-ah Vanesa Kaladzinskaya lakah a tlawm.

Semifinal-ah Kaladzins-kaya hian Chinese wrestler Pang Qianyu a hneh loh zui avangin Vinesh Phogat hi repechage round-ah a inlan thei dawn lo. Hmeichhe wrestler dang Anshu Malik pawh 57kg category-ah repechage round hmangin bronze medal beisei leh mah se Valeria Koblova hneh loin a tla.