ISL player man to ber Apuia

Mizo midfielder Laleng-mawia (Apuia) chuan NorthEast United chhuahsanin Mumbai City a zawm dawn ta a, Indian club hausa hian Apuia manah vaibelchhe hnih bawr vel an theh chhuak!

Vaivakawn tlangval hi Indian Super League transfer-a player man to ber a ni zui nghal a, season tharah mipui beiseina a sang lehzual dawn.

Apuia hi Mumbai City bakah ATK Mohun Bagan chuan lakluh tumin an hel a, NorthEast United-ah kum khat atan contract a la neih avangin Highlander hian chhuahtir tawp an phal bik lo.

Guwahati club hian fing takin a manah vaibelchhe hnih an chhiar a, Bagan hian a tirah vaibelchhe khat leh Sumit Rathi pek tel turin dawr mah se a tawpah a ngam huai zawk Mumbai club-in an chang.

Apuia a pui
FIFA Under-17 World Cup 2017 India-in a thlen ṭum khan Apuia hi India squad-ah a tel a, Mizoram aṭanga World Cup khel hmasa ber a ni - hmun pawimawh erawh a chang phak lo thung.

Mahse, Apuia hian beidawng loin a bei chhunzawm a, I League lamah Indian Arrows tan a hming a chher hnuin kum 2019 khan NorthEast United a zawm - Highlander-ah season khat a khelh hnuin season hman zawh takah a hming a rawn chher a, Apuia chanchin in zawh nawn a ngai tawh lo.

Kum 20 mi defensive midfielder hian match 22 khelin goal khat a khung a, tackle vawi 93-a nei a, vawi 23 block neiin vawi 46 ngawt interception a nei thei. November 30 khan ISL match-ah captain armband a hreng a, kum 20 leh ni 45 mi niin ISL-a captain ni thei naupang ber record a siam.

India leh transfer
Indian football-ah player leichhuah nan sum sen a ni ngai meuh lo a, kum 2012 a Prayag United SC-in Pune FC player Lester Fernandez lei chhuak tura Pune club hnena nuai 20 an pek kha Indian football bikah chuan player mana club an insen hmasak ber a ni.

Indian Super League awm hnuah transfer fee an uar chho a, Apuia hma Indian footballer bika man to ber chu Liston Colaco a ni - kum 22 mi forward hi kumin April khan ATK Mohun Bagan chuan vaibelchhe 1.2-in Hyderabad FC aṭangin an lei chhuak.

Indian footballer bikah chuan goalkeeper Dheeraj Singh-a'n nuai 70-a Bagan aṭanga FC Goa a zawm te, Ashique Kuruniyan-a'n nuai 75-a Pune City aṭanga Bengaluru a zawm te, Bagan-in FC Goa aṭanga nuai 80-a Manvir Singh an lei te leh Michael Soosairaj-a'n nuai 90-a Jamshedpur FC aṭanga Bagan a zawm te chu transfer langsar zual dang an ni.

Apuia man a tam
Kum 2018 khan Spanish midfielder Edu Garcia chu Chinese League One club Zhejiang Greentown chuan vaibelchhe khatin an lei a, kum 2019 khan Chennai City forward Pedro Manzi chuan Japanese J2 league club Albirex Niigata chu vaibelchhe 1.2-in a lo zawm tawh bawk.

Season hmasa khan FC Goa midfielder Hugo Boumous chu Mumbai City-in vaibelchhe 1.76 sengin an lo lei tawh a, Indian football transfer record a ni - he record hi Boumous vek hian tun nipui transfer-ah a thaichhe leh a, ATK Mohun Bagan chu vaibelchhe hnihin a zawm.

Mizo tlangval Apuia a lo lang a, Boumous-a record nihrualin Indian football-a player man to ber ni turin Mumbai City chu vaibelchhe hnihin a zawm ve leh ta - Apuia hi J League club FC Tokyo pawhin an enthlak zingah an telh a, official tak erawhin Highlander an dawr lo thung.