Australia hnehin USA an tlang

Olympic mipa basketball a nih tawh chuan United States chu champion tura rinkai ber an ni nghal zel. Tokyo Olympic 2020-ah pawh an match hmasa berah beisei phak lo mah se tunah chuan final an lut leh ta.

Champion lai US hian nimin khan Australia chu 97-78 a hnehin final an lut a, a zawna a vawi li nan Olympic gold medal dawn an tum dawn. Semifinal inkhel hnuhnung zawkah France chuan Slovenia 90-89 a hnehin final an lut ve bawk.

Final hi August 7, Inrinni zing dar 8:00-a khelh tur niin, semifinal-a chak lo team pahnihte hian tlai lamah bronze medal an inchuh ve leh thung dawn a ni.

Semifinal inkhel hmuhnawm takah Australia hian quarter hnihnaah point 15 zetin hma an hruai fal hman, mahse Kevin Durant leh Devin Booker an neih miau avangin US hi inkhel chawhnu lamah an tho chhuak.

US tana point 23 neitu Durant chuan, "Australia khan fak an phu, a tir aṭanga a tawp thlengin min chhaih buai thei hle. Second half-ah erawh thil engkim kha kan tan a fuh thung, a tawpah kan vannei," a ti. An chak theih nan Booker-a'n point 20 a nei ve bawk a ni.