Ligue 1 an ṭan dawn ta

France rama football inelna sang ber Ligue 1 2021-22 season chu zanin aṭangin an khel ṭan dawn, dar 12:30-ah AS Monaco leh Nantes te an inhmachhawn ang. Champion tura rinkai Paris St-Germain erawh Inrinni zanah an inlan ang.

Season hmasa khan Lille chuan PSG hnen aṭangin league nomawi an chhuhsak, Paris club lian hian player thar rual nen laklet an tum dawn; season dang zawng aiin hlawhtlinna an duh zual ang tih a rin theih.

A khuh hawnna
Monaco hi 2017-18 season champion an ni a, tun hnaiah chuan Lille nen chiah PSG kara league nomawi chawi thei an ni. Champion tura rinkai ni lem lo mah se Paris club el buai phak tura ngaih an ni - zainah hnehna nena bul ṭan an tum ang.

Nantes nen an intawn tawhnaah Monaco hian record an nei ṭha, an intawn hnuhnung 26 aṭangin vawi 16 zet an chak - chak loh vawi nga chiah an nei. Tun ṭuma an inkhelhna tur hi Stade Louis II a nih avangin an buk a rit zual dawn.

Season hmasa khan Monaco hian pathumna ni chungin season an khar. Manager Niko Kovac-a'n Cesc Fabregas, Wissam Ben Yedder, Sofiane Diop leh Aurelien Tchouameni a la chhawr thei dawn a, an chesual viau a nih loh chuan a sang pawlah an awm a rinawm.

Poch fiahna
Mauricio Pochettino-a'n Paris St-Germain a enkawl hmasak season-ah beisei an phak lo. Argentine manager hian a hna a chan duh lo a nih chuan Ligue 1 title an laklet a ngai dawn, league bakah Champions League thlengin an beisei ang.

Argentine manager hian nipui bazar chhungin Sergio Ramos, Georginio Wijnaldum, Gianluigi Donnarumma leh Achraf Hakimi te a lei tawh - an player lakluhte hi tawnhriat nei ṭha vek an ni, anni nei chunga UCL an chawi lo a nih chuan manager an dem a rinawm.

Kylian Mbappe an la nei a, France international hi a chhuak dawn lo niin a lang. Neymar erawh chawlh a hmanna lamah invawng tawk lo a, Brazil tana Copa America final kheltu hian 100% a fit ṭha tur chuan hun a mamawh dawn.