Hnehna nen Nadal a lo kir

Hun rei tak a inkhelh loh hnuah Rafael Nadal chu tennis court-ah a lo kir leh ta, Spanish tlangval hian Washington Open a match hmasa berah Jack Sock chu 6-2, 4-6, 7-6 (7-1) in a hneh.

Grand Slam vawi 20 champion tawh Nadal hian Wimbledon leh Tokyo Olympic a khel lo a, French Open hnua a match khelh leh hmasak berah hian duhthusamin khel nghak lo mah se hnehna a chan avangin result ṭha a ni tho.

Kum 35 mi Nadal chuan, "Ka ke phah na pawh a dam fel thawkhat tawh, inkhelh chhung khan na ka hre meuh lo. Tun hma lama ka sawi fo tawh angin tournament tir lam hi chu a harsa ka ti ziah.

"Jack te ang player ṭha nena match hmasa ber khelh chu a awlsam lo a ni, a tir lamah phei kha chuan ka talbuai lek lek ṭhin," a ti, inkhel hi a hmunah mipui 7,500 chuangin an en thei tawh a ni.

Nadal hian a match lehpekah chuan seeded 14-na Lloyd Harris a hmachhawn leh ang, Harris hi a khingpui tur Tennys Sandgren chu hliam vangin a inlan thei lo, inkhelh hah ngai loin a tlang.

Hard court inelnaah hian seeded parukna Dan Evans erawh Brandon Nakashima lakah 7-6 (7-1), 6-0 in a chak lo. Player langsar dang Alex de Minaur, Grigor Dimitrov, Alexander Bublik, Taylor Fritz leh Benoit Paire te pawh an inlan dawn.